1,152 மில்லியன் ரூபா பெறுமதியான ஹெரோயின் போதைப்பொருள் தொகையொன்று ஆழ்கடலில் வைத்து கடற்படையினரால் கைப்பற்றப்பட்டுள்ளது.

கடற்படையினரால் மேற்கொள்ளப்பட்ட விசேட தேடுதல் நடவடிக்கையின் போது, ​​இலங்கைக்கு மேற்கே சுமார் 200 கிலோமீற்றர் தொலைவில் உள்ள ஆழ்கடல் பகுதியில் இந்த போதைப்பொருள் தொகை கண்டுபிடிக்கப்பட்டுள்ளது.

இதன்போது, பல நாள் மீன்பிடி படகுடன் ஐந்து சந்தேகநபர்கள் கைது செய்யப்பட்டுள்ளனர்.

சந்தேகநபர்கள் 23-33 வயதுடைய கந்தர பிரதேசத்தை சேர்ந்தவர்கள் என தெரிவிக்கப்படுகிறது. 

கடற்படையினர் மீன்பிடி படகினை காலிக்கு கொண்டு வந்து சோதனையிட்ட போது, ​​இரண்டு மூடைகளினுள் 40 பொதிகளில் அடைத்து வைக்கப்பட்டிருந்த இந்த ஹெரோயின் தொகையினை கடற்படையினர் கண்டுபிடித்தனர்.

இதன் எடை 46 கிலோ 116 கிராம் என கடற்படை தெரிவித்துள்ளது.

ஹெரோயின் போதைப்பொருள் தொகை, சந்தேகநபர்கள் மற்றும் பல நாள் மீன்பிடி படகு ஆகியவை மேலதிக சட்ட நடவடிக்கைகளுக்காக பொலிஸ் போதைப்பொருள் ஒழிப்பு பணியகத்திடம் ஒப்படைக்கப்பட உள்ளன.