Apr 27, 2025 - 07:36 PM -
0
இந்தியன் பிரீமியர் லீக் (IPL) தொடரில் மும்பை வான்கடே மைதானத்தில் லக்னோ சூப்பர் ஜெயன்ட்ஸ் அணிக்கு எதிராக இன்று (27) இடம்பெற்ற போட்டியில் மும்பை இந்தியன்ஸ் அணி 54 ஓட்டங்களால் வெற்றிபெற்றுள்ளது.
ஐபிஎல் தொடரின் 45ஆவது லீக் போட்டியாக இடம்பெற்ற இப்போட்டியில், நாணய சுழற்சியில் வெற்றி பெற்ற லக்னோ சூப்பர் ஜெயன்ட்ஸ் அணி முதலில் களத்தடுப்பில் ஈடுபட தீர்மானித்தது.
அதற்கமைய, முதலில் துடுப்பெடுத்தாடிய மும்பை இந்தியன்ஸ் அணி 20 ஓவர்கள் நிறைவில் 7 விக்கெட்டுக்களை இழந்து 215 ஓட்டங்களை பெற்றுக்கொண்டது.
அவ்வணி சார்பாக ரியன் ரிக்கெல்டன் 58 ஓட்டங்களையும் சூர்யகுமார் யாதவ் 54 ஓட்டங்களையும் பெற்றுக்கொடுத்தனர்.
லக்னோ சூப்பர் ஜெயன்ட்ஸ் அணியின் பந்துவீச்சில் மயங்க் யாதவ் மற்றும் அவெஷ் கான் ஆகியோர் தலா இரண்டு விக்கெட்டுக்கள் வீதம் கைப்பற்றினர்.
இதனைத் தொடர்ந்து 216 என்ற வெற்றி இலக்கை நோக்கிய களமிறங்கிய லக்னோ சூப்பர் ஜெயன்ட்ஸ் அணி 20 ஓவர்களில் 161 ஓட்டங்களுக்கு சகல விக்கெட்டுக்களையும் இழந்தது.
லக்னோ சூப்பர் ஜெயன்ட்ஸ் அணி சார்பாக அயுஷ் பதோனி 35 ஓட்டங்களையும், மிச்செல் மார்ஷ் 34 ஓட்டங்களையும் பெற்றுக்கொடுத்தனர்.
மும்பை இந்தியன்ஸ் அணியின் பந்துவீச்சில் ஜஸ்ப்ரிட் பும்ரா 4 விக்கெட்டுக்களையும் ட்ரென்ட் போல்ட் 3 விக்கெட்டுக்களையும் கைப்பற்றினர்.
இந்த வெற்றியின் ஊடாக மும்பை இந்தியன்ஸ் அணி 12 புள்ளிகளைப் பெற்று புள்ளிப்பட்டியலில் இரண்டாவது இடத்திற்கு முன்னேறியுள்ளமை குறிப்பிடத்தக்கது.

