18 ஆவது ஐ.பி.எல். கிரிக்கெட் போட்டி இந்தியாவின் பல்வேறு நகரங்களில் இடம்பெற்று வருகிறது. இதில் பங்கேற்றுள்ள 10 அணிகள் இரு பிரிவாக பிரிக்கப்பட்டு மோதுகின்றன. 5 அணிகளுடன் தலா 2 முறை, மீதமுள்ள 4 அணிகளுடன் ஒரு முறை என ஒவ்வொரு அணியும் மொத்தம் 14 லீக்கில் விளையாட வேண்டும். லீக் சுற்று முடிவில் டாப்-4 இடங்களை பிடிக்கும் அணிகள் 'பிளே-ஆப்' சுற்றுக்கு முன்னேறும்.

இந்த தொடரில் இன்று (30) இரவு சென்னை சேப்பாக்கத்தில் உள்ள எம்.ஏ.சிதம்பரம் மைதானத்தில் நடைபெறும் 49 ஆவது லீக் ஆட்டத்தில் சென்னை சூப்பர் கிங்ஸ், பஞ்சாப் கிங்ஸ் அணியை எதிர்கொள்கிறது.

5 முறை சாம்பியனான சென்னை அணி இந்த சீசனில் வழக்கத்துக்கு மாறாக தள்ளாடுகிறது. 9 ஆட்டங்களில் ஆடி 2 வெற்றி (மும்பை, லக்னோவுக்கு எதிராக) 7 தோல்வி கண்டு கடைசி இடத்தில் இருக்கும் சென்னை அணி ஏறக்குறைய அடுத்த சுற்று (பிளே-ஆப்) வாய்ப்பை இழந்து விட்டது.

முதலாவது மற்றும் 7 ஆவது ஆட்டத்தில் மட்டும் வெற்றி பெற்ற சென்னை அணி மற்ற ஆட்டங்கள் அனைத்திலும் சறுக்கலை சந்தித்தது. இதுவரை 21 வீரர்களை பயன்படுத்தி பார்த்தும் சரியான கலவையை கண்டறிய முடியாமல் தவிக்கிறது. சொந்த மைதானமான சேப்பாக்கத்தில் பெரும்பாலும் ஆதிக்கம் செலுத்தும் சென்னை அணி நடப்பு தொடரில் இதுவரை இல்லாத நிகழ்வாக தொடர்ச்சியாக 4 தோல்வியை தழுவியிருக்கிறது.

ஸ்ரேயாஸ் அய்யர் தலைமையிலான பஞ்சாப் கிங்ஸ் அணி 9 ஆட்டங்களில் ஆடி 5 வெற்றி, 3 தோல்வி, ஒரு முடிவில்லை (கொல்கத்தாவுக்கு எதிரான ஆட்டம் மழையால் ரத்து) என 11 புள்ளிகளுடன் 5 ஆவது இடத்தில் இருக்கிறது.

இவ்விரு அணிகளும் இதுவரை 31 முறை நேருக்கு நேர் மோதி இருக்கின்றன. இதில் 16 ஆட்டங்களில் சென்னையும், 15 ஆட்டங்களில் பஞ்சாப்பும் வெற்றி பெற்று இருக்கின்றன. மெதுவான தன்மை கொண்ட சேப்பாக்கம் ஆடுகளத்தில் சுழற்பந்து வீச்சு முக்கிய பங்கு வகிக்கும்.