அம்பலாங்கொட, மோதர தேவாலயக் குழுவின் தலைவரான கரந்தெனிய சுத்தா எனும் குற்றவாளியின் மைத்துனர் கொல்லப்பட்ட சம்பவம் தொடர்பில் பிரதான சந்தேகநபர் காலி மாவட்ட குற்றத்தடுப்புப் பிரிவினரால் கைது செய்யப்பட்டுள்ளார். 

சந்தேகநபர் 'மஹதுர இசுரு' என்பவர் எனவும், தனது தந்தையை கரந்தெனிய சுத்தா கொலை செய்ததற்குப் பழிவாங்கும் நோக்கில் இந்தக் கொலையைச் செய்ததாகப் பொலிஸ் விசாரணைகளின் போது அவர் தெரிவித்துள்ளார். 

சந்தேகநபருக்குத் தங்குமிட வசதிகளை வழங்கிய ஒருவரும் கைது செய்யப்பட்டுள்ளதாகப் பொலிஸார் தெரிவித்தனர். 

அம்பலாங்கொட, மோதர தேவாலயக் குழுவின் தலைவரும் கரந்தெனிய சுத்தாவின் மைத்துனருமான மிரந்த வருசவிதான என்பவரே இவ்வாறு சுட்டுக் கொல்லப்பட்டிருந்தார். 

மோட்டார் சைக்கிளில் பயணித்துக் கொண்டிருந்த போது, பின்னால் வந்த கார் ஒன்றினால் மோதி விபத்தை ஏற்படுத்திய பின்னர் துப்பாக்கிச் சூடு நடத்தப்பட்டிருந்தது. 

பின்னர் இச்சம்பவம் தொடர்பில் மேற்கொள்ளப்பட்ட விசாரணைகளில், கரந்தெனிய சுத்தாவைப் பழிவாங்குவதற்காகவே இந்தக் கொலை செய்யப்பட்டமை தெரியவந்துள்ளது. 

கடந்த மே மாதம் 4 ஆம் திகதி மீட்டியாகொட பகுதியில் கரந்தெனிய சுத்தாவின் தரப்பினரால் கொல்லப்பட்ட மஹதுர நலின் என்பவரின் மகனான மஹதுர இசுரு இக்கொலையுடன் நேரடியாகத் தொடர்புபட்டுள்ளமை பொலிஸ் விசாரணைகளில் தெரியவந்துள்ளது. 

அதற்கமைய மேற்கொள்ளப்பட்ட விசாரணைகளில் 30 வயதான மஹதுர இசுரு என்பவர் செல்லக்கதிர்காமம் பகுதியில் வைத்து காலி மாவட்ட குற்றத்தடுப்புப் பிரிவினரால் நேற்று (25) கைது செய்யப்பட்டார். 

மஹதுர இசுருவிடம் மேற்கொள்ளப்பட்ட விசாரணைகளில், மோதர தேவாலயக் குழுவின் தலைவரைக் கொலை செய்வதற்குத் தான் நேரடியாகச் சம்பந்தப்பட்டதாக அவர் வாக்குமூலம் அளித்துள்ளார். 

அவரது மோட்டார் சைக்கிளை மோதிய காரைத் தானே ஓட்டிச் சென்றதாகவும் சந்தேகநபர் பொலிஸாரிடம் தெரிவித்துள்ளார். 

துப்பாக்கிச் சூட்டின் பின்னர் காரை கரந்தெனிய எகொடவெல பகுதியில் கைவிட்டுச் சென்றதாகவும் சந்தேகநபர் தெரிவித்துள்ளதாகக் கூறப்படுகிறது. 

கொலையின் பின்னர் தான் நாட்டின் பல பகுதிகளில் மறைந்திருந்ததாகவும் சந்தேகநபர் தெரிவித்துள்ளார். 

அவரை 7 நாட்கள் தடுப்புக்காவல் உத்தரவின் பேரில் தடுத்து வைத்து விசாரிப்பதாகப் பொலிஸார் மேலும் தெரிவித்தனர். 

இந்தக் கொலையுடன் மஹதுர இசுருவின் குடும்பத்தினர் அனைவரும் பிரதேசத்தை விட்டுத் தப்பிச் சென்று தலைமறைவாக உள்ளதாக பொலிஸ் தகவல்கள் தெரிவிக்கின்றன. 

அத்துடன், அவர்களது எதிர் தரப்பு கும்பலான கரந்தெனிய சுத்தாவின் தரப்பைச் சேர்ந்த குடும்ப உறுப்பினர்களும் வசிப்பிடங்களிலிருந்து தப்பிச் சென்று மறைந்துள்ளதாகம் தெரிவிக்கப்படுகிறது.