தங்காலைக்கு அண்மித்த கடற்பரப்பில் ஐஸ் மற்றும் ஹெரோயின் போதைப்பொருள் 376 கிலோ கிராமிற்கு அண்மித்த தொகையை நாட்டுக்குக் கொண்டுவந்த சம்பவம் தொடர்பில் கைது செய்யப்பட்டுள்ள சந்தேகநபர்களை அடுத்த மாதம் 9ஆம் திகதி வரை விளக்கமறியலில் வைக்குமாறு கொழும்பு நீதவான் நீதிமன்றம் இன்று (26) உத்தரவிட்டது. 

இச்சம்பவம் தொடர்பில் கடந்த உள்ளூராட்சி மன்றத் தேர்தலில் ஐக்கிய மக்கள் சக்தி சார்பில் போட்டியிட்ட வேட்பாளர் ஒருவர் உள்ளிட்ட 7 சந்தேகநபர்களுக்கு எதிராகவே இந்த உத்தரவு பிறப்பிக்கப்பட்டது. 

பொலிஸ் போதைப்பொருள் ஒழிப்புப் பணியகத்தினர் இச்சந்தேகநபர்களைக் கொழும்பு பிரதம நீதவான் அசங்க எஸ். போதரமக முன்னிலையில் ஆஜர்படுத்தியிருந்தனர்.

இதன்போது 7 நாள் தடுப்புக்காவல் உத்தரவின் பேரில் தடுத்து வைத்து விசாரிக்கப்பட்ட இச்சந்தேகநபர்களைப் பொலிஸ் போதைப்பொருள் ஒழிப்புப் பணியகத்தினர் இன்று நீதவான் முன்னிலையில் ஆஜர்படுத்தியிருந்தனர். 

இதன்போது பொலிஸ் போதைப்பொருள் ஒழிப்புப் பணியகத்தின் அதிகாரிகள் நீதிமன்றத்தில் சமர்ப்பணங்களை வைத்து, இச்சந்தேகநபர்கள் தொடர்பான விசாரணைகள் நிறைவடையவில்லை எனவும், அவர்களை விளக்கமறியலில் வைக்குமாறும் கோரிக்கை விடுத்தனர். 

அதற்கமைய, கைப்பற்றப்பட்ட போதைப்பொருள் தொகையை அரச இரசாயன பகுப்பாய்வாளரிடம் அனுப்பி அறிக்கை கோருவதற்கு உத்தரவொன்றைப் பிறப்பிக்குமாறும், போதைப்பொருள் கைப்பற்றப்பட்ட நெடுநாள் மீன்பிடிப் படகின் GPS கருவியை நில அளவைத் திணைக்களத்திற்கு அனுப்பி அறிக்கையொன்றைக் கோருவதற்கு அனுமதி வழங்குமாறும், போதைப்பொருளுடன் காணப்பட்ட 2 துப்பாக்கிகளை அரச இரசாயன பகுப்பாய்வாளரிடம் அனுப்பி அறிக்கையொன்றைக் கோருவதற்கு அனுமதி வழங்குமாறும் பொலிஸ் போதைப்பொருள் ஒழிப்புப் பணியகத்தின் அதிகாரிகள் நீதிமன்றத்தில் கோரிக்கை விடுத்தனர். 

தங்காலைக்கு அண்மித்த கடற்பரப்பில் கடற்படையினர் மேற்கொண்ட சுற்றிவளைப்பின் போது 115 கிலோ கிராம் ஹெரோயின் போதைப்பொருளையும், 261 கிலோ கிராம் ஐஸ் போதைப்பொருளையும் கைப்பற்றப் பொலிஸ் போதைப்பொருள் ஒழிப்புப் பணியகத்திற்கு முடிந்திருந்தது. 

அச்சம்பவம் தொடர்பிலேயே இச்சந்தேகநபர்கள் கைது செய்யப்பட்டுள்ளனர்.