Oct 1, 2026 - 01:49 PM
இலங்கை சமூகப் பாதுகாப்புச் சபை மற்றும் கிராமிய அபிவிருத்தி, சமூகப் பாதுகாப்பு மற்றும் சமூக வலுவூட்டல் அமைச்சு ஆகியவற்றின் ஏற்பாட்டில் நடைபெற்ற சமூகப் பாதுகாப்புக்கான தேசிய விருது வழங்கும் நிகழ்வு – 2026, கடற்றொழில், நீரியல் மற்றும் கடல் வளங்கள் அமைச்சர் இராமலிங்கம் சந்திரசேகர், வடக்கு மாகாண ஆளுநர் நா. வேதநாயகன், கூட்டுறவு அபிவிருத்தி பிரதி அமைச்சர் உபாலி சமரசிங்க ஆகியோரின் பங்கேற்புடன் நேற்று (30) வவுனியாவில் நடைபெற்றது.
இந்நிகழ்வில், வடக்கு மாகாணத்தின் யாழ்ப்பாணம், கிளிநொச்சி, முல்லைத்தீவு, மன்னார் மற்றும் வவுனியா ஆகிய ஐந்து மாவட்டங்களையும் சேர்ந்த அரச அதிகாரிகள், மாவட்டச் செயலர்கள், பிரதேச செயலர்கள் மற்றும் சமூகப் பாதுகாப்புத் துறை உத்தியோகத்தர்கள் கலந்து கொண்டனர்.
சமூகப் பாதுகாப்புத் திட்டங்களைச் சிறப்பாக நடைமுறைப்படுத்திய பிரதேச செயலகங்கள் மற்றும் இத்துறையில் அர்ப்பணிப்புடன் பணியாற்றிய அரச உத்தியோகத்தர்களுக்கான தேசிய விருதுகள் இதன்போது வழங்கப்பட்டுக் கௌரவிக்கப்பட்டன. பணச்சேகரிப்பு உள்ளிட்ட பல்வேறு செயற்பாடுகளில் சிறப்பாகப் பங்களித்த பிரதேச செயலகங்களும் தனிநபர்களும் விருதுகளைப் பெற்றுக் கொண்டனர்.
சமூகப் பாதுகாப்புத் திட்டங்களை மக்களிடம் கொண்டு சேர்ப்பதிலும், தகுதியுடையவர்களைப் பயனாளிகளாக இணைப்பதிலும் மாவட்ட மற்றும் பிரதேச நிர்வாக அதிகாரிகள், திட்டமிடல் மற்றும் சமுர்த்தி உத்தியோகத்தர்கள், சமூக சேவை உத்தியோகத்தர்கள், கிராம அலுவலர்கள் உள்ளிட்ட களப் பணியாளர்கள் ஆற்றிவரும் பங்களிப்பு இந்நிகழ்வின் ஊடாக அங்கீகரிக்கப்பட்டது.
சமூகப் பாதுகாப்புச் சபையின் திட்டங்கள், அரச ஓய்வூதியம் கிடைக்காதவர்களின் முதிய வயதுக்கான பொருளாதாரப் பாதுகாப்பை உறுதிப்படுத்துவதுடன், மரண நலன், இயலாமை நலன் மற்றும் கல்வி உதவித்தொகை உள்ளிட்ட பல்வேறு நலன்களையும் உள்ளடக்கியுள்ளன. இத்திட்டங்கள் தொடர்பான விழிப்புணர்வை அதிகரித்து, தகுதியுடைய அதிகளவான மக்களைப் பயனாளிகளாக இணைப்பதன் முக்கியத்துவமும் இந்நிகழ்வில் எடுத்துக்காட்டப்பட்டது.
வடக்கு மாகாணத்தின் அனைத்து மாவட்டங்களிலும் சமூகப் பாதுகாப்புத் திட்டங்களை மேலும் வலுப்படுத்தி, மக்களின் எதிர்கால சமூக மற்றும் பொருளாதாரப் பாதுகாப்பை உறுதிப்படுத்துவதற்கும், அரச உத்தியோகத்தர்களின் அர்ப்பணிப்பான சேவையை அங்கீகரிப்பதற்கும் இவ்விருது வழங்கும் நிகழ்வு முக்கியத்துவம் வாய்ந்ததாக அமைந்தது.
இந்நிகழ்வில் மாவட்டச் செயலர்கள், மேலதிக மாவட்டச் செயலர்கள், பிரதேச செயலர்கள், திட்டமிடல் பணிப்பாளர்கள், கிராம அலுவலர்கள், சமுர்த்தி அபிவிருத்தி உத்தியோகத்தர்கள் மற்றும் இலங்கை சமூகப் பாதுகாப்புச் சபையின் அதிகாரிகள் உள்ளிட்ட பலரும் கலந்து கொண்டனர்.