சென்னையில் உள்ள இலங்கை துணை உயர் ஆணையகம், ஏப்ரல் 24 முதல் 26 வரை சென்னை Green Meadows Resort வளாகத்தில், முதல் முறையாக 'இலங்கை உணவுத் திருவிழா 2026' ஐ வெற்றிகரமாக நடத்தியது. 

3 நாட்கள் நடைபெற்ற இந்த விழாவில் 700 க்கும் மேற்பட்டோர் கலந்து கொண்டனர். 

தென்னிந்திய திரைப்பட நடிகர், நடிகைகள், இராஜதந்திரிகள், வணிகத் தலைவர்கள், சுற்றுலா துறை பிரதிநிதிகள், ரோட்டரி கழக உறுப்பினர்கள் மற்றும் ஊடகப் பணியாளர்கள் உள்ளிட்ட பல்வேறு துறைகளைச் சேர்ந்த பெருமளவானோர் இதில் பங்கேற்றனர். 

இந்த விழா, இலங்கையின் பல்வேறு உணவுப் பண்பாட்டை உலகிற்கு அறிமுகப்படுத்துவதற்கும், விருந்தினர்கள் பாரம்பரிய இலங்கை உணவுகளின் உண்மையான சுவையை அனுபவிப்பதற்கும் ஒரு சிறந்த வாய்ப்பாக அமைந்தது. 

உணவுப் பண்பாட்டின் மூலம் சுற்றுலா, வர்த்தகம் மற்றும் இரு நாடுகளின் மக்களுக்கு இடையேயான உறவுகளை வலுப்படுத்துவதும், இலங்கை மற்றும் தென்னிந்தியாவுக்கு இடையேயான கலாச்சார உறவுகளை மேம்படுத்துவதும் இந்நிகழ்வின் முக்கிய நோக்கமாக இருந்தது. இந்நோக்கம் வெற்றிகரமாக நிறைவேறியது. 

2026 இலங்கை உணவுத் திருவிழாவின் பிரதம விருந்தினராக வெல்ஸ் பல்கலைக்கழகத்தின் நிறுவனர் மற்றும் தலைவர் டாக்டர் இஷாரி கே. கணேஷ் கலந்து கொண்டார். அதேபோல் துவார்கா புரொடக்ஷன்ஸ் நிறுவனத்தைச் சேர்ந்த பிளேஸ் கண்ணன், கொழும்பு சினமன் கிராண்ட் ஹோட்டலின் பொது மேலாளர் நசூமி அசார் மற்றும் இலங்கை நடிகர் கலண குணசேகர ஆகியோரும் இதில் பங்கேற்றனர். 

கொழும்பு சினமன் கிராண்ட் ஹோட்டலின் அனுபவமிக்க சமையல் கலைஞர்கள் கலந்து கொண்டது இந்த விழாவின் முக்கிய சிறப்பாகும். அவர்களின் திறமையால், பார்வையாளர்கள் இலங்கை உணவுகளின் உண்மையான சுவையை அனுபவிக்க முடிந்தது. மேலும், இலங்கை காவல்துறை நடனக் குழுவினரின் பாரம்பரிய நடன நிகழ்ச்சிகள், இலங்கையின் செழுமையான கலாச்சார பாரம்பரியத்தை வெளிப்படுத்தின. 

இந்த நிகழ்வில் ரோட்டரி மாவட்டம் 3234 இன் மாவட்ட ஆளுநர் சுரேஷ் ஜெயின் மற்றும் சென்னை கோஸ்டல் ரோட்டரி கழகத்தின் தலைவர் நவீன் குப்தா ஆகியோரும் கலந்து கொண்டனர். மேலும், ரோட்டரி கழகம் இலங்கைக்கு ஒரு ஆம்புலன்ஸ் வழங்கவும், 30 பள்ளிகளை புதுப்பிக்கவும் திட்டமிட்டுள்ளதாக அறிவித்தது. இது சுகாதாரம் மற்றும் கல்வி துறைகளில் இரு நாடுகளுக்கிடையேயான ஒத்துழைப்பை மேலும் வலுப்படுத்துகிறது. 

இந்நிகழ்வு, இலங்கை துணை உயர் ஆணையர் டொக்டர் கணேசநாதன் கீதீஸ்வரன் தலைமையில், இலங்கை வெளிநாட்டு விவகாரங்கள், வெளிநாட்டு வேலைவாய்ப்பு மற்றும் சுற்றுலா அமைச்சகம், இலங்கை சுற்றுலா மேம்பாட்டு பணியகம், கொழும்பு சினமன் கிராண்ட் ஹோட்டல், இந்திய வெளிநாட்டு விவகாரங்கள் அமைச்சகம், இந்திய அரசின் சுற்றுலா துறை, தமிழ்நாடு அரசின் சுற்றுலா துறை, துவார்கா புரொடக்ஷன்ஸ் மற்றும் டார்ல்டன் டீ ஆகியவற்றின் ஒத்துழைப்புடன் ஏற்பாடு செய்யப்பட்டது.