காலையில் எழுந்தவுடன் வெறும் வயிற்றில் எந்த உணவுகளை எடுத்துக்கொள்வதில் கவனம் தேவை? அவற்றால் என்ன பாதிப்புகள் ஏற்படலாம்? என்பதை இந்தத் தொகுப்பில் பார்க்கலாம். 

காலையில் சீக்கிரம் எழுந்திருப்பதே கஷ்டம்னா, எழுந்ததும் டீ, காபி குடிக்காமல் இருப்பது அதைவிட கஷ்டம். ஆனால், காலையில் எழுந்தவுடன் வெறும் வயிற்றில் டீ, காபி குடித்தால் சிலருக்கு நெஞ்செரிச்சல், வயிற்று அசௌகரியம் போன்ற பிரச்சனைகள் ஏற்படலாம். 

குறிப்பாக, காபியில் உள்ள காஃபின் (Caffeine) வயிற்றில் அமில உற்பத்தியை அதிகரித்து, குடல் பகுதியில் எரிச்சலை உண்டாக்கும். ஏற்கனவே அசிடிட்டி பிரச்சினை இருப்பவர்கள் கவனமாக இருக்க வேண்டும் என வைத்தியர்கள் அறிவுறுத்துகின்றனர். 

எலுமிச்சை, ஆரஞ்சு போன்ற citrus பழங்கள் உடலுக்கு நல்லதுதான். ஆனால், இவற்றை வெறும் வயிற்றில் சாப்பிடும்போது நெஞ்செரிச்சலை உருவாக்கும். 

பஜ்ஜி, போண்டா, வடை போன்ற அதிக எண்ணெய் மற்றும் கொழுப்பு கொண்ட உணவுகளை காலையில் வெறும் வயிற்றில் சாப்பிடுவது செரிமானத்தை சிரமமாக்கி, வயிறு உப்பசமாக இருப்பது போன்று தோன்றும். 

அசிடிட்டி, வயிற்று உப்புசம் போன்ற பிரச்சினைகள் உள்ளவர்களுக்கு தயிர் அல்லது Yoghurt அசௌகரியத்தை ஏற்படுத்தும். அப்படிப்பட்டவர்கள் வெறும் வயிற்றில் சாப்பிடாமல் மதிய உணவுடன் சேர்த்து எடுத்துக்கொள்வது சிறந்தது. 

ஆரோக்கியமானவர்கள் வெறும் வயிற்றில் வாழைப்பழம் சாப்பிடுவதால் பெரிய பாதிப்பு இல்லை. ஆனால், சிலருக்கு காலையில் வெறும் வயிற்றில் வாழைப்பழம் சாப்பிடும்போது வயிற்று உப்புசம் அல்லது அசௌகரியம் ஏற்படலாம். 

அதிகமாகப் பழுத்த வாழைப்பழத்தை சாப்பிடும்போது இரத்தச் சர்க்கரை வேகமாக உயரலாம். எனவே, சர்க்கரை நோய் உள்ளவர்கள் வாழைப்பழத்தின் அளவு மற்றும் பழுத்த நிலையை கவனிப்பது நல்லது. 

1992 இல் Diabetic Medicine இதழில் வெளியான ஆய்வில், வாழைப்பழம் பழுக்கும்போது அதிலுள்ள மாவுச்சத்து சர்க்கரையாக மாறுவதால் இந்த வேறுபாடு ஏற்படுவதாக ஆய்வாளர்கள் தெரிவித்துள்ளனர். 

எல்லோருக்கும் வெறும் வயிற்றில் குறிப்பிட்ட உணவுகளை சாப்பிடுவது ஆபத்தானது என்று பொதுவாகக் கூற முடியாது. ஒருவருக்கு பிரச்சினை ஏற்படுத்தும் உணவு மற்றொருவருக்கு எந்தத் தொந்தரவும் தராமல் இருக்கலாம். 

ஒருவருக்கு எந்த பிரச்சினையும் ஏற்படுத்தாத உணவு, மற்றொருவருக்கு நெஞ்செரிச்சல், ஏப்பம் அல்லது அஜீரணத்தை ஏற்படுத்தலாம். எனவே, வைத்தியரின் ஆலோசனையை பெறுவது நல்லது. 

குறிப்பாக அசிடிட்டி அல்லது Gastroesophageal reflux disease (GERD) போன்ற இரைப்பை பிரச்சினை உள்ளவர்கள் தனிப்பட்ட உணவு பழக்கத்தில் கவனம் செலுத்துவது நல்லது.