Oct 23, 2026 - 11:14 AM
நியூசிலாந்து அணிக்கு எதிரான 5 போட்டிகள் கொண்ட சர்வதேச டி20 கிரிக்கெட் தொடரில் விளையாடி வரும் இந்திய அணிக்குத் திடீர் பின்னடைவு ஏற்பட்டுள்ளது.
அந்த அணியின் முன்னணி விக்கெட் கீப்பர் பேட்டரான இஷான் கிஷன், காயம் காரணமாக நாளை (24) நடைபெறவுள்ள 2 ஆவது டி20 ஆட்டத்தில் இருந்து அதிகாரப்பூர்வமாக விலகியுள்ளார்.
நேற்று (22) இடம்பெற்ற முதல் போட்டியில் இந்தியா 4 விக்கெட் வித்தியாசத்தில் வெற்றி பெற்ற நிலையில், அந்த ஆட்டத்தின் போது இஷான் கிஷனுக்கு வலது தொடையில் பலத்த தசைப்பிடிப்பு காயம் ஏற்பட்டது.
இஷான் கிஷனின் காயம் குறித்து பிசிசிஐ தனது அதிகாரப்பூர்வ அறிக்கையில் விரிவாக விளக்கம் அளித்துள்ளது. "நியூசிலாந்துக்கு எதிரான முதல் டி20 போட்டியின் போது இஷான் கிஷனின் வலது தொடை உள் பகுதியில் லேசான தசைப்பிடிப்பு காயம் ஏற்பட்டது.
இதன் காரணமாக அவர் நாளை நடைபெறும் 2 ஆவது டி20 போட்டியில் விளையாட மாட்டார். தற்போது பிசிசிஐ வைத்தியக் குழுவினர் அவரது காயத்தின் தீவிரத்தை முழுமையாகக் கண்காணித்து வருகின்றனர்" என்று பிசிசிஐ அறிக்கையில் தெரிவிக்கப்பட்டுள்ளது.
தொடை தசைப்பிடிப்பு காயத்தில் இருந்து இஷான் கிஷன் முழுமையாகக் குணமாக எத்தனை நாள்கள் ஆகும் என்ற தகவலை பிசிசிஐ இன்னும் வெளியிடவில்லை.
அடுத்தடுத்த போட்டிகளில் அவர் விளையாடுவாரா என்பதும் வைத்திய அறிக்கையின் முடிவிலேயே தெரியவரும். முதல் போட்டியில் மிடில் ஆர்டரில் களமிறங்கிய இஷான் கிஷன் திடீரென விலகியிருப்பது அணி நிர்வாகத்திற்கு சிக்கலை ஏற்படுத்தியுள்ளது.
தொடரில் இந்தியா 1 - 0 என முன்னிலை வகிக்கும் சூழலில், முக்கிய பேட்டர் காயமடைந்துள்ளது ரசிகர்களுக்கு ஏமாற்றத்தை தந்துள்ளது.
இஷான் கிஷனின் இந்த காயம் காரணமாக, பெஞ்சில் அமர்ந்திருக்கும் மாற்று வீரர்களுக்கு ஆடும் லெவனில் புதிய கதவுகள் திறக்க வாய்ப்பு உருவாகியுள்ளது. குறிப்பாக, முதல் போட்டியில் சேர்க்கப்படாத இளம் வீரர் வைபவ் சூர்யவன்ஷிக்கு வாய்ப்பு வழங்கப்படும் என எதிர்பார்க்கப்படுகிறது.
இந்தியாவின் ஆடும் லெவனில் செய்யப்படவுள்ள அதிரடி மாற்றம் பெரும் ஆர்வத்தைத் தூண்டியுள்ளது. கிறைஸ்ட்சர்ச்சில் நாளை இந்தியா - நியூசிலாந்து அணிகளுக்கு இடையே 2 ஆவது டி20 போட்டி நடைபெற உள்ளது.