வண்ணமயமான விஷயங்கள் மீது எப்போதுமே நமக்கு ஆர்வம் அதிகம். ஆனால் உணவில் மட்டும் அதை பெரிதாக நாம் கண்டுகொள்வதே இல்லை. பல வண்ணங்களில் இருக்கும் காய்கறிகள், பழங்களில் நிறைய சத்துக்கள் இருக்கின்றன.

அவற்றை அதிகமாக உணவில் சேருங்கள் என்று தொடர்ந்து மருத்துவர்கள் அறிவுறுத்தி வருகிறார்கள். ஆனால் நாம் அதை பெரிய அளவில் கவனத்தில் கொள்வதில்லை. குறிப்பாக பர்ப்பிள் நிறங்களில் உள்ள உணவுகளை சேர்த்துக் கொள்வது மிக அரிதாகவே இருக்கிறது.

ஆனால் இந்த பர்பிள் நிற காய்கறிகள் மற்றும் பழங்களில் உள்ள ஆற்றலை பற்றி நமக்குத் தெரிவதே இல்லை. குறிப்பாக அவை மூளையில் செய்யும் அதிசயங்களைப் பற்றி தெரிந்து கொள்வதே இல்லை. வாங்க இனியாவது தெரிஞ்சிப்போம்.

பர்பிள் என்று சொல்லப்படுகிற கருஊதா நிற உணவுகளை அதிகமாக நம் உணவில் சேர்த்துக் கொள்வதன் வாயிலாக மன அழுத்தம், மூளையின் செயல்பாட்டை அதிகரித்தல், முன்கூட்டியே வயதாவதைத் தடுப்பது ஆகிய பல மாற்றங்களை நம் உடலில் பார்க்க முடியும்.

குறிப்பாக குழந்தைகளுக்கு தொடர்ந்து கொடுத்துப் பாருங்கள் அவர்களுடைய நினைவாற்றலை கண்டு வியந்து போவீர்கள். இந்த கருஊதா உணவுகளில் அப்படி என்ன தான் இருக்கிறது. அவை உடலில் என்னவெல்லாம் செய்யும் என்று பார்க்கலாம் வாங்க.

மூளை ஆரோக்கியத்துக்கு பர்பிள் நிற உணவுகள்

மூளையின் செயல்திறனை மேம்படுத்துவதற்கு கவனங்களைக் குவிக்கும் சில யோகசனங்கள் மற்றும் அவற்றோடு ஆரோக்கியமான உணவுப் பழக்கம் ஆகியவை இருந்தாலே போதும்.

மூளை என்பது நம்முடைய அறிவாற்றலுக்கு மட்டுமானது அல்ல, மூளை சீராகவும் திறம்படவும் செயல்பட்டதால் தான் உடல் இயக்கமே சீராக இருக்கும். உடலின் ஒவ்வொரு உநுப்புகளின் பராமரிப்புக்காகவும் அயராது உழைக்கும் உறுப்பு தான் மூளை.

அதை பத்திரமாக பாதுகாக்க ஆரோக்கியமான உணவுகள் அவசியம். அவற்றில் ஒன்று தான் இந்த பர்பிள் நிற உணவுகள். உங்கள் மூளையின் ஆற்றலை அதிகரிக்க என்னென்ன பர்பிள் நிற உணவுகளை எடுத்துக் கொள்ளலாம்னு வாங்க பார்க்கலாம்,

பர்பிள் முட்டைகோஸ்

வழக்கமாக வெளிர் பச்சை நிற முட்டைகோஸ் தான் அதிகமாக சாப்பிடுவோம். இதிலும் நிறைய சத்துக்கள் இருக்கின்றன. ஆனால் அதைவிட பர்பிள் நிற முட்டைகோஸ் எடுத்துக் கொள்வது இன்னும் சிறந்தது.

பர்ப்பிள் நிற முட்டைகோஸில் ஆந்தோசயின்கள் மற்றும் பிற சேர்மங்கள் அதிகமாக இருக்கின்றன. இவற்றில் உள்ள ஆன்டி இன்ஃபிளமேட்டரி பண்புகள் மூளை செல்களில் ஏற்படும் அழுத்தம் மற்றும் சேதங்களைக் குறைக்கும்.

ப்ளுபெர்ரி மற்றும் பிளாக் பெர்ரி

பொதுவாகவே பெர்ரி பழங்களில் ஆன்டி ஆக்சிடண்ட்டுகள் நிறைந்து இருக்கின்றன என்பது நமக்குத் தெரியும்.

அதிலும் குறிப்பாக பிளாக் மற்றும் ப்ளூபெர்ரி பழங்களை தினசரி உணவில் சேர்த்துக் கொள்ளுங்கள்.

இந்த பெர்ரிகளில் ஆந்தோசயின் உள்ளிட்ட பல ஆற்றல்வாய்ந்த ஆன்டி ஆக்சிடண்ட்டுகள் இருக்கின்றன. அவை மூளையின் ஆரோக்கியத்தை மேம்படுத்தி அறிவாற்றல் செயல்பாட்டையும் அதிகரிக்கிறது.

ப்ளம்ஸ் மற்றும் நாவல்பழம்

ப்ளம்ஸ் மற்றும் நாவல் பழங்கள் நிறைய வைட்டமின்களும் ஆற்றல்வாய்ந்த ஊட்டச்சத்துக்களும் நிறைந்து இருக்கின்றன.

இவை மூளையின் ஆரோக்கியத்துக்குத் தேவையான மிக முக்கியமான ஊட்டச்சத்துக்கள் ஆகும். வயதாகும் போது ஏற்படுகிற மூளை செல்களின் சேதத்தைத் தடுக்க இவை உதவுகின்றன.

ஊதா நிற கத்தரிக்காய்

கத்தரிக்காயில் பச்சை நிற கத்தரிக்காய், வரிக்கத்தரிக்காய், நீல நில கத்தரிக்காய் என பல வகைகள் உண்டு.

அவற்றில் இந்த நீல நிற கத்தரிக்காயில் ஆந்தோசயின்கள் உள்ளிட்ட ஆற்றல் வாய்ந்த ஆன்டி ஆக்சிடண்ட்டுகள் இருக்கின்றன.

இவை மூளையில் ஏற்படும் ஆக்சிஜனேற்ற அழுத்தத்தைக் குறைப்பதோடு இன்ஃபிளமேஷன்கள் ஏற்படாமலும் தடுக்கும். அதனால் அடிக்கடி இந்த நீல நிற கத்தரிக்காயை உணவில் சேர்த்துக் கொள்ளப் பாருங்கள்.

பனீர் திராட்சை

கருஊதா நிறத்தில் இருக்கும் பனீர் திராட்சையில் பல அற்புதமான ஊட்டச்சத்துக்கள் நிறைந்து இருக்கின்றன. சுவையும் மிகுந்தது.

இந்த ஊதா நிற திராட்சை ஆன்டி இன்ஃபிளமேட்டரி பண்புகள் நிறைந்து இருக்கின்றன. அவை இன்ஃபிளமேஷன்களைத் தடுப்பதோடு மூளை செல்களின் ரத்த ஓட்டத்தையும் அதிகரிக்கச் செய்யும். இதுபோன்ற மேலும் பயனுள்ள தகவல்களுக்கு​ இறுதியாக,

மேற்கண்ட எல்லா ஊதா நிற உணவுகளுமே நமக்கு மிக எளிதாக, தினசரி கிடைக்கக்கூடியவை தான். இவற்றில் ஏதேனும் ஒன்றை உங்களுடைய தினசரி உணவில் இருக்கும்படி பார்த்துக் கொண்டால் மூளையின் செயல்திறன் மேம்படுவதை நீங்களே உணர முடியும். அதுதவிர உடலில் இன்ஃபிளமேஷன்கள் உண்டாவதையும் தடுக்க முடியும். அதேசமயம் இங்கு கூறப்பட்டிருக்கும் செய்தி தகவல்களுக்கானவையே தவிர இவை பிரச்சினைகளுக்கான நேரடி மருந்துகள் கிடையாது. அதனால் உடல் பிரச்சினைகள் இருப்பின் இந்த ஆரோக்கிய உணவு முறையோடு மருத்துவ ஆலோசனையும் பெறுங்கள்.