2026 ஐசிசி டி20 உலகக் கிண்ணத் தொடரின் முதலாவது அரையிறுதிப் போட்டியில், நியூசிலாந்து அணிக்கு 170 ஓட்டங்களை வெற்றி இலக்காகத் தென்னாபிரிக்க அணி நிர்ணயித்துள்ளது.

கொல்கத்தா, ஈடன் கார்டன்ஸ் மைதானத்தில் இன்று (04) நடைபெற்று வரும் இப்போட்டியில், நாணய சுழற்சியில் வென்று முதலில் களத்தடுப்பைத் தீர்மானித்த நியூசிலாந்து அணியின் அழைப்பையேற்றுத் தென்னாபிரிக்க அணி முதலில் துடுப்பெடுத்தாடியது.

ஆரம்பத்தில் சில விக்கெட்டுகளை இழந்து தென்னாபிரிக்க அணி சற்றுத் தடுமாறிய போதிலும், அதிரடியாகத் துடுப்பெடுத்தாடிய மார்கோ ஜான்சன் 54 ஓட்டங்களையும், இளம் வீரர் டெவால்ட் ப்ரீவிஸ் 34 ஓட்டங்களையும் பெற்று அணியின் ஓட்ட எண்ணிக்கையை கணிசமாக உயர்த்தினர். 

இவர்களின் சிறப்பான இணைப்பாட்டத்தின் மூலம் தென்னாபிரிக்க அணி நிர்ணயிக்கப்பட்ட 20 ஓவர்கள் முடிவில் 8 விக்கெட்டுக்களை இழந்து 169  ஓட்டங்களை பெற்றுக்கொண்டது.

நியூசிலாந்து அணியின் பந்துவீச்சில், சிறப்பான திறமையை வெளிப்படுத்திய ரச்சின் ரவீந்திரா, கோல் மெக்கொன்சி மற்றும் மேட் ஹென்றி ஆகியோர் தலா 2 விக்கெட்டுகளை வீழ்த்தித் தென்னாபிரிக்க அணியின் ஓட்ட வேகத்தைக் கட்டுப்படுத்தினர்.

தற்போது 170 ஓட்டங்கள் என்ற சவாலான வெற்றி இலக்கை நோக்கி, மிட்செல் சான்ட்னர் தலைமையிலான நியூசிலாந்து அணி தனது துடுப்பாட்டத்தை ஆரம்பிக்கத் தயாராகி வருகிறது. 

இப்போட்டியில் வெற்றி பெறும் அணி எதிர்வரும் 8 ஆம் திகதி நடைபெறும் மாபெரும் இறுதிப் போட்டிக்கு நேரடியாகத் தகுதிபெறும் என்பது குறிப்பிடத்தக்கது.