வடமேற்கு பாகிஸ்தானின் கைபர் பக்துன்க்வா மாகாணத்தில் உள்ள ஒரு பொலிஸ் நிலையத்தை குறிவைத்து நேற்று (02) இரவு நடத்தப்பட்ட தற்கொலை கார் குண்டுத் தாக்குதலில், மூன்று பெண்கள் மற்றும் ஒரு குழந்தை உட்பட ஐந்து பேர் கொல்லப்பட்டதாக அந்நாட்டு பொலிஸார் தெரிவித்துள்ளனர். 

இந்த வெடிவிபத்தில் அருகிலிருந்த பல வீடுகளும் சேதமடைந்தன. குறைந்தது நான்கு பொலிஸார் காயமடைந்ததாக தெரிவிக்கப்பட்டுள்ளது. அதிகாரிகள் நிலைமையை தொடர்ந்து ஆய்வு செய்து வருகின்றனர். மேலும், அவசரகால மீட்பு மற்றும் நிவாரண பணிகள் தொடர்ந்து நடைபெற்று வருகின்றன. 

பன்னு மாவட்டம், டோமெல் தாலுக்காவில் உள்ள ஒரு காவல் நிலையத்தின் மீது காரை ஓட்டி வந்த தற்கொலை தாக்குதல் நடத்தியவர் மோதியதில், தொலைதூரம் வரை கேட்கக்கூடிய சக்திவாய்ந்த வெடிச்சத்தம் ஏற்பட்டது என தெரிவிக்கப்படுகிறது. 

இந்த வெடிப்பின் தீவிரமும், அதிர்வலைகளும் அப்பகுதி மக்களிடையே பீதியை ஏற்படுத்தின. வெடிப்பு நிகழ்ந்த உடனேயே துப்பாக்கிச் சூடு வெடித்ததால், அப்பகுதியில் பதற்றம் மேலும் அதிகரித்தது. 

பொலிஸ் நிலையமே முதன்மை இலக்காக இருந்தது என முதற்கட்ட தகவல்கள் தெரிவிக்கின்றன என அதிகாரிகள் கூறினர். 

பொலிஸ் தகவல்படி, மீட்புக் குழுவினர் சம்பவ இடத்திலிருந்து மூன்று பெண்கள் மற்றும் ஒரு குழந்தை உட்பட ஐந்து உடல்களை மீட்டுள்ளனர்.