2010 ஆம் ஆண்டிற்குப் பின்னர் பிறந்த அனைத்துப் பிள்ளைகளையும் புகையிலை பாவனையற்ற ஒரு தலைமுறையாக மாற்றுவதற்கான பரிந்துரைகள் அடங்கிய கருத்துருத் தாள், சுகாதார மற்றும் ஊடகத்துறை அமைச்சரிடம் கையளிக்கப்பட்டுள்ளது.

இந்த வேலைத்திட்டமானது புகையிலை மற்றும் மதுசாரம் மீதான தேசிய அதிகார சபையினால் தயாரிக்கப்பட்டுள்ளதுடன், வருங்கால சந்ததியினரைப் புகையிலை மற்றும் சிகரெட் தயாரிப்புகளிலிருந்து பாதுகாப்பதே இதன் பிரதான நோக்கமாகும்.

புகையிலை மற்றும் மதுசாரத்தினால் ஏற்படும் சமூகப் பாதிப்புகளைக் குறைப்பதற்காக, புகையிலை மற்றும் மதுசாரம் மீதான தேசிய அதிகார சபை, இலங்கை மருத்துவ சங்கம் மற்றும் ஏனைய மருத்துவ நிபுணத்துவ அமைப்புகள் மற்றும் அரச சார்பற்ற நிறுவனங்கள் இணைந்து இரண்டு முக்கிய நடவடிக்கைகளைப் பரிந்துரைத்துள்ளன:

முதல் நடவடிக்கை: புகையிலை மற்றும் மதுசாரம் மீதான தேசிய அதிகார சபையின் சட்டத்திலுள்ள விதிமுறைகளை இற்றைப்படுத்துவதற்கான திருத்தங்களைக் கொண்டு வருதல்.

இரண்டாவது நடவடிக்கை: “புகையிலை அற்ற எதிர்கால சந்ததி” என்ற எண்ணக்கருவின் கீழ், ஒரு குறிப்பிட்ட வயது வரம்பிற்குப் பிறகு பிறந்த அனைவரும் புகையிலை மற்றும் புகையிலை தயாரிப்புகளை அணுகுவதைத் தடை செய்தல்.

உலகின் பல நாடுகள் ஏற்கனவே இச்சட்டத்தை அங்கீகரித்துள்ளன.

சுகாதார மற்றும் ஊடகத்துறை அமைச்சர் கலாநிதி நலிந்த ஜயதிஸ்ஸ, இந்தப் புகையிலை தயாரிப்புகளைத் தடை செய்வதற்கான முயற்சிக்குத் தனது பாராட்டுக்களைத் தெரிவித்ததுடன், பிள்ளைகளின் ஆரோக்கியமான எதிர்காலத்திற்குப் புகையிலை மற்றும் மதுசாரம் ஒரு பெரும் தடையாக இருப்பதாகவும் சுட்டிக்காட்டினார்.

இலங்கையில் நிகழும் மரணங்களில் சுமார் 80% தொற்றா நோய்களினால் ஏற்படுகின்றன. இதற்குப் புகையிலை மற்றும் மதுசாரமே பிரதான காரணமாகும்.

உலகளவில் ஆண்டுதோறும் சுமார் 80 மில்லியன் மக்கள் புகையிலை பாவனையினால் உயிரிழக்கின்றனர். இதில் 70 மில்லியன் பேர் நேரடியாகவும், சுமார் 10% சதவீதமானோர் மறைமுகப் புகைபிடித்தலாலும் உயிரிழக்கின்றனர்.

இலங்கையில் புகையிலை மற்றும் மதுசாரத்தினால் ஆண்டுதோறும் நிகழும் மரணங்களின் எண்ணிக்கை சுமார் 22,000 ஆகும். இவை ஏனைய போதைப்பொருள் பாவனைக்கான ஆரம்ப நுழைவாயிலாகவும் அமைகின்றன.

பாடசாலைக் கட்டமைப்பிற்குள் இளைஞர்கள் மத்தியில் சிகரெட் பாவனை ஓரளவுக்கு அதிகரித்து வருவதாக ரஜரட்ட பல்கலைக்கழகத்தின் மருத்துவ பீடத்தைச் சேர்ந்த எல்.எல். அமில இசுரு சுட்டிக்காட்டினார்.