விஜய் டிவியில் ஒளிபரப்பாகி வரும் சின்ன மருமகள் தொடரின் நாயகன் நவீன், திடீரென வைத்தியசாலையில் அனுமதிக்கப்பட்டிருக்கிறார். 

சின்னத்திரையில் ரசிகர்களின் கவனத்தை ஈர்த்து வெற்றிகரமாக ஒளிபரப்பாகி வரும் “சின்ன மருமகள்” சீரியல், பரபரப்புக்கும் விறுவிறுப்புக்கும் பஞ்சமில்லாத இந்த தொடரில் ஸ்வேதா நாயகியாக நடித்து வருகிறார். இந்த நிலையில், சின்ன மருமகள் சீரியலின் கதாநாயகனாக நடித்து வரும் நடிகர் நவீன் படப்பிடிப்பு தளத்தில் ஏற்பட்ட உடல்நலக்குறைவு காரணமாக வைத்தியசாலையில் அனுமதிக்கப்பட்ட சம்பவம் ரசிகர்களை அதிர்ச்சியில் ஆழ்த்தியுள்ளது. 

தகவலின்படி, சில நாட்களுக்கு முன்பு கடும் வெயிலில் ஆக்‌ஷன் காட்சி ஒன்றின் படப்பிடிப்பு நடைபெற்றதாக தெரிவிக்கப்படுகிறது. நீண்ட நேரம் வெப்பமான சூழலில் நடித்ததால், நடிகர் நவீனின் உடல் வெப்பநிலை திடீரென அதிகரித்து, அவருக்கு மூச்சுத்திணறல் ஏற்பட்டுள்ளது. 

படப்பிடிப்பை முடித்துவிட்டு வீட்டிற்கு சென்ற பிறகும் அவரின் உடல்நிலை சீராகாததால், உடனடியாக அருகிலுள்ள வைத்தியசாலை அவர் அழைத்துச் செல்லப்பட்டுள்ளார். 

அங்கு வைத்தியர்கள் பரிசோதனை செய்து, ஆக்ஸிஜன் உதவி வழங்கியதுடன், முழுமையான ஓய்வு அவசியம் என அறிவுறுத்தியதாக தகவல் வெளியாகியுள்ளது. ஆனால் சீரியலின் முக்கியமான திருமணக் காட்சிகள் திட்டமிட்டபடி நடைபெற வேண்டியிருந்ததால், தயாரிப்பு குழு அவரை மீண்டும் படப்பிடிப்பிற்கு வருமாறு கேட்டுக் கொண்டதாக தெரிவிக்கப்படுகிறது. இதையடுத்து, வைத்தியசாலையில் இருந்து நேரடியாகவே நடிகர் நவீன் படப்பிடிப்பு தளத்திற்கு சென்றதாக தகவல்கள் தெரிவிக்கின்றன.