நிதி மற்றும் குத்தகை நிறுவனங்களிடமிருந்து பெறப்பட்ட வாகனங்கள் அல்லது பிற உபகரணங்களை மீண்டும் அத்தகைய நிறுவனங்களின் கட்டுப்பாட்டின் கீழ் கொண்டுவரும் போது, நடைமுறையிலுள்ள சட்டங்களின்படி செயல்பட வேண்டும் என்று பொலிஸ் ஊடகப் பேச்சாளர் உதவிப் பொலிஸ் அத்தியட்சகர் எஃப்.யு. வுட்லர் தெரிவித்தார். 

நிதியுதவியின் கீழ் பெறப்பட்ட ஏதேனும் பொருள்கள் இருந்தால், அவற்றை மீண்டும் கைப்பற்றுவதற்கு எவ்வாறு செயல்பட வேண்டும் என்பது குறித்து 2000 ஆம் ஆண்டின் 56 ஆம் இலக்க குத்தகை நிதியளிப்புச் சட்டத்தின் 27 ஆம் பிரிவில் தெளிவாகக் குறிப்பிடப்பட்டுள்ளதாக அவர் கூறினார். 

அதன்படி, இது தொடர்பாகச் சம்பந்தப்பட்ட குத்தகை வழங்குநர், அப்பகுதிக்கு பொறுப்பான பொலிஸ் நிலைய பொறுப்பதிகாரி அல்லது தலைமையக பொலிஸ் பரிசோதகருக்கு அறியத்தர வேண்டும் என்றும், அதன் மூலம் வாகனங்களை மீளப் பெறும்போது பொலிஸ் உதவியைப் பெற முடியும் என்றும் அவர் குறிப்பிட்டார். 

இருப்பினும், சட்ட விதிகளுக்குப் புறம்பாக அத்துமீறி நுழைவதோ அல்லது பலவந்தமாகக் கைப்பற்றுவதோ இடம்பெற்றால், அது குறித்துச் சட்டத்தை நடைமுறைப்படுத்த பொலிஸார் நடவடிக்கை எடுப்பார்கள் என்றும் அவர் மேலும் தெரிவித்தார். 

"குத்தகை நிறுவனங்கள் மற்றும் நிதி நிறுவனங்கள் மூலம் வாகனங்கள் உள்ளிட்ட குத்தகை நிதியளிப்புக்கு உட்படுத்தப்பட்ட உபகரணங்களை மீண்டும் தம்வசப்படுத்தும்போது செயல்பட வேண்டிய விதம் குறித்த விதிகள் 2000 ஆம் ஆண்டின் 56 ஆம் இலக்க குத்தகை நிதியளிப்புச் சட்டத்தின் 27 ஆம் பிரிவில் மிகவும் தெளிவாக விவரிக்கப்பட்டுள்ளன என்பதை நாங்கள் நினைவூட்ட வேண்டும். இங்கு குத்தகை வழங்குநர், அச்செயற்பாட்டை முன்னெடுப்பதற்கு முன்பாகவே அந்த உரிமை குறித்துச் சம்பந்தப்பட்ட பகுதி பொலிஸ் நிலைய பொறுப்பதிகாரி அல்லது தலைமையக பொலிஸ் பரிசோதகருக்குத் தெரியப்படுத்த வேண்டும். இந்த அறிவிப்பின் மூலம், குத்தகை வழங்குநர் தனது உரிமையைச் செயல்படுத்தும்போது அமைதிக்கு பங்கம் ஏற்படுவதைத் தடுப்பதற்காகப் பொலிஸ் அதிகாரிகளின் உதவியைப் பெற முடியும். அதில் தலைமையக பொலிஸ் பரிசோதகர் அல்லது பொலிஸ் நிலைய பொறுப்பதிகாரி தேவையான உதவியை வழங்கி, உரிய நடவடிக்கைகளை எடுக்க முடியும். 

குறிப்பாக, இந்த உபகரணங்களைத் தம்வசம் வைத்துள்ள நபரிடமிருந்து எவ்வித எதிர்ப்பும் இல்லை எனில், எவ்வித அமைதிப் பங்கமும் இன்றி குத்தகை வழங்குநர் அந்த உபகரணத்தைத் தனது கட்டுப்பாட்டில் எடுக்க முடியும். இருப்பினும், அந்த உபகரணத்தைத் தனது வசப்படுத்தச் செல்லும்போது எதிர்ப்புத் தெரிவிக்கப்படும் பட்சத்தில், குத்தகை வழங்குநர் அது தொடர்பாக மாவட்ட நீதிமன்றத்தின் உதவியை நாட வேண்டும். சில சந்தர்ப்பங்களில் மாவட்ட நீதிமன்றத்தின் உதவியை நாடாமல், இந்த விதிகளுக்குப் புறம்பாகச் செயல்படுவதன் மூலம், குறிப்பாகக் குத்தகை வழங்குநர் அல்லது அவரது பிரதிநிதி சட்டச் சிக்கல்களை எதிர்கொள்ள நேரிடும். இது குறித்து விசாரணை நடத்தும்போது ஒரு குற்றவியல் தவறு உருவாகினால், அதாவது கொள்ளையடித்தல், சட்டவிரோதமாக அத்துமீறி நுழைதல் அல்லது பலவந்தமாகக் கைப்பற்றுதல் போன்றவை இடம்பெற்றால், அது குறித்தும் சட்டத்தைச் செயல்படுத்த நேரிடும்." என்றார்.