தொழிலாளர் தட்டுப்பாடு காரணமாக இயந்திரங்கள், தரவுகள் மற்றும் புதிய ரக தொழிலாளர்களை நோக்கி நகரும் பெருந்தோட்ட நிறுவனங்கள்

தொழில்நுட்பம் மற்றும் புத்தாக்கங்கள் மூலம் தோட்டங்களின் செயல்பாடுகள், வள நிர்வகிப்பு மற்றும்
உற்பத்தித் திறன் ஆகியவை மறுவடிவமைப்பு செய்யப்பட்டு, இலங்கையின் பெருந்தோட்டத் துறை ஒரு
புதிய மாற்றத்தின் அத்தியாயத்திற்குள் நுழைந்துவருகிறது. நாட்டின் தேயிலைத் தோட்டங்கள் மற்றும் இதர
பெருந்தோட்டங்களில், ஒரு காலத்தில் முற்றிலும் கைகளால் மட்டுமே செய்யப்பட்டு வந்த வேலைகளில்
தற்போது திறமையான தொழிலாளர்களுக்கு உதவியாக இயந்திரங்கள் அதிகளவில் பயன்படுத்தப்பட்டு
வருகின்றன. அதேவேளையில், பாரம்பரியமாக வெறும் அனுபவத்தை மட்டுமே நம்பி எடுக்கப்பட்ட
முடிவுகள், இப்போது மென்பொருள் மற்றும் டிஜிட்டல் தரவுகளின் உதவியுடன் மிகவும் துல்லியமாக
எடுக்கப்படுகின்றன.

தற்போது பெருந்தோட்டங்களில் தானியங்கி அறுவடை இயந்திரங்கள், கத்தரிப்பு (Pruning) இயந்திரங்கள்
மற்றும் ட்ரோன்கள் ஆகியவற்றுடன் GIS செயற்கைக்கோள் வரைபடமாக்கல், டிஜிட்டல் எடை அளவீட்டு
முறைகள் மற்றும் நிறுவன மென்பொருட்கள் ஆகியவை பயன்படுத்தப்பட்டு வருகின்றன. இந்தத்
தொழில்நுட்பங்கள் வெவ்வேறாக இருந்தாலும், அவை அனைத்தும் ஒரு பொதுவான இலக்கை நோக்கியே
வழிகாட்டுகின்றன: அதாவது, மாறிவரும் தொழிலாளர் சூழலுக்கு மத்தியில், அதிகரித்து வரும் தேவைகளை
மிகவும் புத்திசாலித்தனமான வழிகளில் பூர்த்தி செய்ய பெருந்தோட்டங்கள் பழகி வருகின்றன.

இருப்பினும், இயந்திரமயமாக்கல் என்பது சவால்கள் இல்லாதது அல்ல. செங்குத்தான மலைச்சரிவுகள்,
துண்டு துண்டான நிலங்கள் மற்றும் சீரற்ற பயிர் வளர்ச்சி ஆகியவை எங்கு இயந்திரங்களைச் திறம்படப்
பயன்படுத்தலாம் என்பதைக் கட்டுப்படுத்துகின்றன. இருந்தபோதிலும், உற்பத்திச் செலவுகள் அதிகரித்து
வரும் நிலையிலும், தொழிலாளர் பற்றாக்குறை நிலவும் சூழலிலும், மனிதர்களின் அனுபவ அறிவை நவீன
தொழில்நுட்பத்துடன் ஒருங்கிணைப்பது மட்டுமே தொழில்துறையின் நீண்டகால உயிர்வாழ்விற்கும்
உலகளாவிய போட்டித்திறனுக்கும் இன்றியமையாததாக மாறுகிறது.

தொழிலாளர் தட்டுப்பாட்டிற்குத் தீர்வு காணல்

இலங்கையின் பெருந்தோட்ட நிறுவனங்கள், இத்தொழில்துறை ஆரம்பிக்கப்பட்ட காலத்திலிருந்த
தொழிலாளர் சந்தையிலிருந்து முற்றிலும் மாறுபட்ட ஒரு புதிய சூழலை எதிர்கொள்கின்றன. வெளிநாட்டு
மற்றும் நகர்ப்புற இடப்பெயர்வுகள், மக்கள் தொகையியல் மாற்றங்கள் மற்றும் பிற தொழில்துறைகளில்
உள்ள ஈர்ப்புகள் காரணமாக, தோட்ட வேலைகளுக்காகத் தொழிலாளர்களைத் தொடர்ந்து தக்கவைத்துக்
கொள்வது நிறுவனங்களுக்குப் பெரும் சவாலாக மாறியுள்ளது.

தொழிலாளர் தட்டுப்பாடு காரணமாக, இயந்திரமயமாக்கல் என்பது ஒரு சில வேலைகளுடன்
நின்றுவிடாமல் அனைத்து விவசாயப் பணிகளுக்கும் மிக வேகமாக விரிவடைந்து வருகிறது. உதாரணமாக,
போகவந்தலாவை பெருந்தோட்ட நிறுவனத்தில், நிலத்தைத் தயார் செய்தல், கத்தரித்தல், களை எடுத்தல்,
தேயிலை கொய்தல் மற்றும் விவசாய இரசாயனங்களைத் தெளித்தல் ஆகிய அனைத்துப் பணிகளுக்கும்
தற்போது இயந்திரங்கள் பயன்படுத்தப்பட்டு வருகின்றன. தேயிலைச் செய்கையில் குறிப்பிட்ட அளவிலான
இயந்திர அறுவடை மற்றும் கத்தரிப்பு முறைகள் அறிமுகப்படுத்தப்பட்டுள்ளதுடன், பிற பயிர்களுக்கும்
இந்தத் தானியங்கி முறைகள் விரிவாக்கப்பட்டு வருகின்றன.

அகரபத்தன பெருந்தோட்ட நிறுவனமும் இதே போன்றதொரு நவீன அணுகுமுறையைக் கையாண்டுள்ளது.
தோட்டத்தில் தேயிலை கொய்வதற்காக எரிபொருள் மற்றும் பேட்டரி மூலம் இயங்கும் அறுவடை
இயந்திரங்கள் பயன்படுத்தப்பட்டு வருகின்றன; அதேவேளையில், பழைய வேர்களைப் பிடுங்குவதற்கும்,
புதிய நிலங்களைச் சமப்படுத்துவதற்கும் பேக்ஹோ இயந்திரங்கள் உதவுகின்றன. மேலும், தேயிலை
இலைகளுக்குத் தேவையான கிருமி-நாசினிகளைத் தெளிக்க ட்ரோன்கள் பயன்படுத்தப்படுகின்றன.
தொழிற்சாலைகளைப் பொறுத்தமட்டில், உற்பத்தி அளவு முதலீட்டிற்குச் சாதகமாக இருக்கும் இடங்களில்
தானியங்கி மற்றும் ஆற்றல் திறன்மிக்க இயந்திரங்கள் அறிமுகப்படுத்தப்பட்டு வருகின்றன.

பெருந்தோட்டத் தொழில்நுட்பத்தின் மாறிவரும் முகம்

வெறும் இயந்திரமயமாக்கலைத் தாண்டி, பெருந்தோட்டங்கள் படிப்படியாக டிஜிட்டல் தரவுகளை
அடிப்படையாகக் கொண்ட வணிகங்களாக மாறி வருகின்றன. அகரபத்தன பெருந்தோட்ட நிறுவனம்,
தொழிலாளர்களைக் கண்டறிந்து அவர்களின் அறுவடைத் தரவுகளைப் பதிவு செய்ய முக அங்கீகாரத்
தொழில்நுட்பத்துடன் கூடிய தானியங்கி தேயிலை எடை அளவீட்டு முறைகளை அறிமுகப்படுத்தி
வருகிறது.

இதேபோல், எல்பிட்டிய பெருந்தோட்ட நிறுவனமும் கொய்யப்பட்ட தேயிலைகளின் தரத்தை
மதிப்பிடுவதற்காக 'Ballotronix' தேயிலை இலை வாசகர் (Tea-leaf reader) தொழில்நுட்பத்தை
அறிமுகப்படுத்தியுள்ளது. இந்தத் தொழில்நுட்பம், iHarvest மற்றும் Microsoft Dynamics 365 Business
Central ஆகிய மென்பொருட்களின் மூலம் இயக்கப்படுகிறது. இதன் மூலம், ஆயிரக்கணக்கான
ஹெக்டேயர் பரப்பளவிலான தோட்டங்களில் நடக்கும் செயல்பாடுகளை முகாமையாளர்கள் தங்களது
கணினித் திரையிலேயே உடனுக்குடன் துல்லியமாகக் கண்காணிக்க முடியும்.

தலவாக்கலை பெருந்தோட்ட நிறுவனம் 1992 ஆம் ஆண்டு முதல் திட்டமிட்ட முறையில் நவீனமயமாக்கல்
நடவடிக்கைகளை மேற்கொண்டு வருகிறது. உற்பத்திச் செலவைக் குறைப்பதற்காக 2008 ஆம் ஆண்டு
முதல் அனைத்துத் தொழிற்சாலைகளிலும் வெந்நீர் கொதிகலன்கள் (Hot-water boilers)
அறிமுகப்படுத்தப்பட்டன. மேலும், 2015 ஆம் ஆண்டு முதல் உடனுக்குடன் தரவுகளைச் சேகரிக்கும்
மின்னணு எடை அளவீட்டு முறைகளும், ஊழியர்களுக்கான கணினிகள், டேப்லெட்டுகள் மற்றும் புதிய
ஊதிய முறைகளும் நடைமுறைக்கு வந்துள்ளன. மேலும் புதுப்பிக்கத்தக்க எரிசக்தி: Palmerston, Radella
மற்றும் Somerset தோட்டங்களில் அமைந்துள்ள மூன்று உள்ளூர் நீர்மின் நிலையங்கள் மற்றும் சூரிய சக்தி
மூலம் ஆலைகளுக்குத் தேவையான சுத்தமான ஆற்றல் பெறப்படுகிறது. தாழ்நிலத் தொழிற்சாலைகளில்
தேயிலைத் தரத்தைப் பிரித்தறிய அதிநவீன வண்ணப் பிரிப்பான்கள் வழங்கப்பட்டுள்ளன. 2025 ஆம்
ஆண்டு முதல், இலைகளுக்கான கிருமி-நாசினிகள் மற்றும் பாதுகாப்பு இரசாயனங்களைத் தெளிக்க
ட்ரோன்கள் பயன்படுத்தப்பட்டு வருகின்றன. இந்தத் தொடர் முன்னேற்றங்கள், பெருந்தோட்டத் துறை
எவ்வாறு அதிக செயல்திறன் மற்றும் சுற்றுச்சூழல் பாதுகாப்பிற்காகத் தொழில்நுட்பத்தை முழுமையாக
ஏற்றுக்கொண்டுள்ளது என்பதை எடுத்துக் காட்டுகின்றன.

தொழில்நுட்பத்தின் பயன்பாடு வெறும் பயிர்ச் செய்கை நிலங்களுடன் மட்டும் நின்றுவிடவில்லை;
தொழிற்சாலைகளும் மிக வேகமாகத் தானியங்கி மயமாக்கப்பட்டு வருகின்றன. இதில் ஆற்றல் திறன்மிக்க
இயந்திரங்களுக்கு முக்கியத்துவம் அளிக்கப்படுகிறது. உதாரணமாக, எல்பிட்டிய பெருந்தோட்ட
நிறுவனத்தில், உற்பத்தித் திறனையும் ஒட்டுமொத்தச் செயல்திறனையும் அதிகரிக்கும் நோக்கில்,
அவர்களின் 80 சதவீதத்திற்கும் அதிகமான தொழிற்சாலைகள் அதிநவீன இயந்திரங்களுடன் முழுமையாக
இயந்திரமயமாக்கப்பட்டுள்ளன.

மறுபுறம், மல்வத்தை வெலி பெருந்தோட்ட நிறுவனம் மற்றொரு சாத்தியமான தீர்வைக் காட்டியுள்ளது.
தனது கருவா செய்கையை விரிவுபடுத்திய பின்னர், பட்டைகளை உரிப்பதற்கான திறமையான
தொழிலாளர்களின் பற்றாக்குறையை அந்நிறுவனம் எதிர்கொண்டது. இதற்குத் தீர்வாக, அந்நிறுவனத்தின்
சொந்த பொறியியலாளர்கள் கருவாப் பட்டைகளை உரிப்பதற்கான ஒரு புதிய இயந்திரத்தை சுயமாக
உருவாக்கி, அதற்கான காப்புரிமையையும் (Patent) பெற்றுள்ளனர்.

இது வெறும் தொழிலாளர்களின் தேவையைக் குறைக்கும் ஒரு முயற்சி மட்டுமல்ல. ஒரு துறையில் ஏற்படும்
தட்டுப்பாடானது, எவ்வாறு புதிய தொழில்நுட்பக் கண்டுபிடிப்புகளுக்கு வழிவகுக்கும் என்பதை இது
காட்டுகிறது. அத்துடன், திறமையான தொழிலாளர்களின் பற்றாக்குறையால் ஏற்படும் தடைகளைத்
தாண்டி, ஒரு தொழிற்துறை மேலும் விரிவடைவதற்கும் இது சாத்தியத்தை ஏற்படுத்துகிறது.

இதேவேளையில், இந்நிறுவனம் மட்சா (Matcha) தேயிலை உற்பத்திக்கான தானியங்கி தொழிற்சாலை
அமைப்புகள் மற்றும் இயந்திரங்களிலும் முதலீடு செய்து வருகிறது. இந்தச் சூழலில், தொழில்நுட்பமானது
வெறும் உற்பத்திச் செலவைக் குறைப்பதற்காக மட்டும் பயன்படுத்தப்படவில்லை; மாறாக, எமது
தயாரிப்புகளின் மதிப்புக்கூட்டலை வலுப்படுத்தி, அவற்றை உலக சந்தையில் கூடுதல் விலைக்கு விற்பனை
செய்வதற்காகவே பயன்படுத்தப்படுகிறது. இயந்திரங்கள் தொழிலாளர்களைப் பயனற்றவர்களாக்காது

தொழிலாளர்கள் பாரம்பரியக் கைவேலைகளுக்குப் பதிலாக அறுவடை இயந்திரங்கள், கத்தரிப்பு கருவிகள்
மற்றும் மருந்து தெளிக்கும் சாதனங்களைப் பயன்படுத்துவதற்கு முறையான பயிற்சிகளைப் பெற்று
வருகின்றனர். அதேவேளையில், இயந்திரப் பராமரிப்பு, டிஜிட்டல் தரவு சேகரிப்பு மற்றும் கணினி வழி
அறிக்கை சமர்ப்பித்தல் போன்ற புதிய வேலைவாய்ப்புகளும் இத்துறையில் உருவாகி வருகின்றன.
ஹொரண பெருந்தோட்ட நிறுவனம் தொழிலாளர் தட்டுப்பாட்டிற்குத் தீர்வு காண்பதற்காக இயந்திரங்கள்
மூலம் தேயிலைக் கொழுந்து பறித்தல் முறையை அறிமுகப்படுத்தியுள்ளது. தரம் மற்றும் தொழிலாளர்
உற்பத்தித் திறன் ஆகியவற்றில் நல்ல முன்னேற்றம் ஏற்பட்டுள்ளதாக நிறுவனம் தெரிவித்துள்ளது.
இளைஞர்களை இத்துறைக்கு ஈர்ப்பதற்காக, இந்த தொழில்நுட்பம் சார்ந்த அறுவடை முறையானது
தோட்ட வேலைகளை நவீனமானதாகவும் கவர்ச்சிகரமானதாகவும் மாற்றப் பயன்படுத்தப்படுகிறது.

தொழிலாளர் தட்டுப்பாட்டை எதிர்கொள்ளவும், உற்பத்தித் திறனை அதிகரிக்கவும் பெருந்தோட்டத்
துறைக்குத் தொழில்நுட்பம் என்பது இப்போது ஒரு அத்தியாவசியத் தேவையாக மாறியுள்ளது என
இலங்கை பெருந்தோட்ட முதலாளிமார் சம்மேளனத்தின் பொதுச்செயலாளர் லலித் ஒபயசேகர
தெரிவித்துள்ளார். இலங்கையின் நிலப்பரப்புச் சூழலுக்கு ஏற்ற தொழில்நுட்பங்களுக்கு முக்கியத்துவம்
அளிக்கப்பட வேண்டும் என்றும், தொழிலாளர்கள் அவற்றைச் சரியாகப் பயன்படுத்துவதற்குத் தகுந்த
பயிற்சிகள் வழங்கப்பட வேண்டும் என்றும் அவர் குறிப்பிட்டுள்ளார். ஒரு இயந்திரம் எத்தனை மனித
வேலைகளை செய்யும் என்று சாதாரண கணக்குப்போடுவதை விட, இயந்திரமயமாக்கலை ஒரு பயனுள்ள
வழியாகப் பார்ப்பது இதுவே ஆகும் என்று ஒபயசேகர மேலும் கூறினார். இந்த நவீன மாற்றங்கள்
பெருந்தோட்டத் துறையின் உற்பத்தித் திறனையும் லாபத்தையும் நிச்சயம் உயர்த்தும் என்று அவர்
நம்பிக்கை தெரிவித்துள்ளார்.

அடுத்த அறுவடை

பெருந்தோட்டத் துறையின் எதிர்காலப் பயணம் இப்போது மிகவும் தெளிவாகி வருகிறது. இனிவரும்
காலங்களில் துல்லியமான விவசாய முறை, டிஜிட்டல் வழி பயிர் விளைச்சல் கணிப்பு, தானியங்கி
வானிலை கண்காணிப்பு, ஸ்மார்ட் பாசன முறைகள், டிஜிட்டல் தயாரிப்புத் தகவல் கண்காணிப்பு மற்றும்
கூடுதல் இயந்திரமயமாக்கல் ஆகியவை மிகவும் சாதாரணமான ஒன்றாகிவிடும் என்பது உறுதியாகிறது.
அதன் பொருள், பெருந்தோட்டத் தொழிலாளர்களின் காலம் முடிந்துவிட்டது என்பதோ அல்லது தலைமுறை
தலைமுறையாகக் கடத்தப்பட்டு வந்த அவர்களது விவசாய அறிவு அழிந்துவிடும் என்பதோ அல்ல. மாறாக,
தொழிலாளர்கள் மற்றும் அவர்களது பாரம்பரிய அனுபவம் ஆகிய இரு தரப்புமே தொழில்நுட்பத்துடன்
இணைந்து மிக நெருக்கமாகச் செயல்படப் போகின்றன என்பதே அதன் அர்த்தமாகும்.

இலங்கையின் பெருந்தோட்டத் துறையானது, நீண்ட காலமாக நிலத்திலிருந்தும் மலிவான உடல்
உழைப்பிலிருந்தும் மதிப்பைச் சுரண்டுவதையே தனது போட்டித்திறனாக நம்பியிருந்தது. ஆனால்,
இனிவரும் காலத்திற்கான புதிய விதி மிகவும் எளிமையானது: புதிய வருமான வழிகளை உருவாக்குங்கள்,
கழிவுகளைக் குறையுங்கள் மற்றும் ஒவ்வொரு தொழிலாளியையும், ஒவ்வொரு ஹெக்டேயர் நிலத்தையும்
அதிக உற்பத்தித் திறன் மிக்கதாக மாற்றுங்கள் என்பதே அதுவாகும்.