Oct 14, 2026 - 04:11 PM
DFCC வங்கி தனது வணிகத் தொடர்ச்சி முகாமைத்துவக்
கட்டமைப்புக்காக (Business Continuity Management System - BCMS) ISO
22301:2019 தரச் சான்றைப் பெற்றுள்ளது. இது, எதிர்பாராத
இடையூறுகளின் போது அத்தியாவசிய வங்கிச் சேவைகளைப்
பேணுவதற்கும் வாடிக்கையாளர் நலன்களைப் பாதுகாப்பதற்கும் அது
தனது அர்ப்பணிப்பை வலுப்படுத்துகிறது.
சர்வதேச அளவில் அங்கீகரிக்கப்பட்ட இந்தத் தரச் சான்று, வங்கியின்
வணிகத் தொடர்ச்சி கட்டமைப்பைச் சரிபார்த்து உறுதிப்படுத்துகிறது.
மேலும், அதன் நிர்வாகம், இடர் முகாமைத்துவம், தற்செயல்
நிகழ்வுகளுக்கான திட்டமிடல் மற்றும் அவற்றுக்கான பதில்
நடவடிக்கை வழிமுறைகள் ஆகியவை செயல்பாட்டுத் திறனுக்கான
உலகளாவிய சிறந்த நடைமுறைகளைப் பூர்த்தி செய்கின்றன
என்பதையும் இது உறுதி செய்கிறது.
இந்தச் சாதனை, அத்தியாவசிய வங்கிச் சேவைகளுக்கான
தங்குதடையற்ற அணுகலை உறுதி செய்வதற்கும், பல்வேறு
செயல்பாட்டுச் சவால்களை முன்கூட்டியே கணித்து, பதிலளித்து,
அதிலிருந்து மீண்டு வருவதற்கான தனது திறனை
வலுப்படுத்துவதற்கும் DFCC வங்கி மேற்கொண்டு வரும்
தொடர்ச்சியான முயற்சிகளில் ஒரு குறிப்பிடத்தக்க சாதனை
மைல்கல்லாக அமைகிறது.
ISO 22301:2019 என்பது வணிகத் தொடர்ச்சி முகாமைத்துவக்
கட்டமைப்புகளுக்கான உலகளவில் ஏற்றுக்கொள்ளப்பட்ட
தரநிலையாகும். இது நிறுவனங்களுக்கு ஏற்படக்கூடிய
அச்சுறுத்தல்களைக் கண்டறிவதற்கும், இடையூறுகளுக்குத்
தயாராவதற்கும், மற்றும் முக்கிய வணிகச் செயல்பாடுகளின்
தொடர்ச்சியை உறுதி செய்வதற்கும் ஒரு கட்டமைக்கப்பட்ட
அணுகுமுறையை வழங்குகிறது.
DFCC வங்கியைப் பொறுத்தவரை, இந்தத் தரச் சான்று, நிறுவனம்
முழுவதும் மீள்தன்மை, இடர் முகாமைத்துவம் மற்றும் தயார்நிலை
ஆகியவற்றில் பல ஆண்டுகளாக மேற்கொள்ளப்பட்ட முதலீட்டைப்
பிரதிபலிக்கிறது. இந்தக் கட்டமைப்பு, அணிகள் செயல்பாட்டு
இடர்களைத் திறம்பட நிர்வகிக்கவும், பதில் நடவடிக்கைகளை
ஒருங்கிணைக்கவும், மற்றும் வாடிக்கையாளர்கள், ஊழியர்கள் மற்றும்
பிற பங்குதாரர்கள் மீது எதிர்பாராத நிகழ்வுகளின் தாக்கத்தைக்
குறைக்கவும் உதவுகிறது.
இந்தச் சாதனை குறித்துக் கருத்துத் தெரிவித்த DFCC வங்கியின்
சிரேஷ்ட துணைத் தலைவர் (ஒருங்கிணைந்த இடர் முகாமைத்துவம்)
மற்றும் பிரதம இடர் அதிகாரி குஷான் ஜெயசூரிய, பின்வருமாறு
கூறினார்:
“தனிநபர்கள், குடும்பங்கள் மற்றும் வணிகங்களின் அன்றாட வாழ்வில்
வங்கிச் சேவைகள் முக்கிய பங்காற்றுகின்றன. சவாலான
சூழல்களிலும் அத்தியாவசியச் சேவைகள் தடையின்றி கிடைப்பதை
உறுதி செய்வதே எங்கள் பொறுப்பாகும். ISO 22301:2019 தரச் சான்றைப்
பெற்றது, நாங்கள் உருவாக்கியுள்ள வலுவான வணிகத் தொடர்ச்சி
கட்டமைப்பு மற்றும் வங்கி முழுவதும் உள்ள அணிகள்
வெளிப்படுத்திய கூட்டு அர்ப்பணிப்பு ஆகியவற்றிற்கான
அங்கீகாரமாகும். மிக முக்கியமாக, அபாயங்கள் மற்றும் செயல்பாட்டுச்
சூழல்கள் மாறிவரும் நிலையில், எங்கள் மீள்திறனைத் தொடர்ந்து
மேம்படுத்துவதற்கான ஒரு வலுவான அடித்தளத்தை இது
வழங்குகிறது.
நிர்வாகம், மூலோபாயத் திட்டமிடல், செயல்பாட்டு நடைமுறைகள்
மற்றும் அன்றாட முடிவெடுத்தல் ஆகியவற்றில் வணிகத் தொடர்ச்சி
கொள்கைகளை ஒருங்கிணைப்பதற்கான வங்கி அளவிலான கூட்டு
முயற்சியின் மூலமாகவே இந்தத் தரச் சான்று பெறப்பட்டது. இது DFCC
வங்கியின் தயார்நிலை கலாச்சாரம் மற்றும் தொடர்ச்சியான
முன்னேற்றத்திற்கான அதன் அர்ப்பணிப்பு ஆகியவற்றையும்
பிரதிபலிக்கிறது.
செயல்பாட்டுச் சூழல் தொடர்ந்து மாறிவருவதால், சர்வதேசத்
தரநிலைகளுக்கு ஏற்ப தனது வணிகத் தொடர்ச்சித் திறன்களை
வலுப்படுத்தவும், சோதிக்கவும் மற்றும் மேம்படுத்தவும் DFCC வங்கி
தொடர்ந்து செயல்படும். இதன் மூலம் நம்பகமான சேவையை
வழங்குவதோடு, வாடிக்கையாளர்கள், ஒழுங்குமுறை அமைப்புகள்
மற்றும் பங்குதாரர்களிடையே அதிக நம்பிக்கையையும்
கட்டியெழுப்பும்.
DFCC வங்கி தொடர்பான விபரங்கள்
1955-இல் நிறுவப்பட்டு, 1956 முதல் கொழும்பு பங்குச் சந்தையில்
பட்டியலிடப்பட்டுள்ள DFCC வங்கி பிஎல்சி, இலங்கையின் முன்னணி
நிதி நிறுவனங்களில் ஒன்றாகும். இலங்கை மத்திய வங்கியின்
ஒழுங்குமுறைக்கு உட்பட்டும், Fitch Ratings நிறுவனத்தால் A (lka) என
கடன் தர மதிப்பீடு செய்யப்பட்டும் இயங்கும் இவ்வங்கி, தனிநபர்,
நிறுவன மற்றும் சிறு-நடுத்தர தொழில் துறைகளுக்கான வங்கிச்
சேவைகள் மட்டுமின்றி, திறைசேரி, முதலீடு மற்றும் வர்த்தக நிதித்
தீர்வுகள் உள்ளிட்ட விரிவான சேவைகளை வழங்குகிறது.
வாடிக்கையாளர் மைய அணுகுமுறை மற்றும் நிலைபேற்றியல் சார்ந்த
புத்தாக்கம் ஆகியவற்றைத் தனது முக்கியக் கொள்கையாகக்
கொண்டுள்ள DFCC வங்கி, தடையற்ற மற்றும் பாதுகாப்பான வங்கிச்
சேவை அனுபவங்களை வழங்குகிறது. இதில் DFCC MySpace போன்ற
டிஜிட்டல் தளங்கள், 133 கிளைகளைக் கொண்ட வலையமைப்பு மற்றும்
LankaPay வலையமைப்பின் ஊடாக 6,000-க்கும் மேற்பட்ட ATM-களை
அணுகும் வசதி ஆகியவை அடங்கும்.
நிலைபேற்றியல் சார்ந்த திட்டங்களுக்கான நிதி வழங்கல் மற்றும்
புதுப்பிக்கத்தக்க எரிசக்தி முயற்சிகளில் அங்கீகரிக்கப்பட்ட
முன்னோடியாகத் திகழும் DFCC வங்கி, சுற்றுச்சூழலின் மீதான
தாக்கத்தைக் குறைப்பதிலும், நீண்டகாலப் பொருளாதார
உறுதித்தன்மையை மேம்படுத்துவதிலும் அர்ப்பணிப்புடன் செயல்பட்டு
வருகிறது.