Oct 30, 2026 - 02:16 PM
தேர்தலில் தனது கூட்டணி பெரும்பான்மையை இழந்ததைத் தொடர்ந்து, வெளிநாட்டுத் தலையீடு இருப்பதாகக் குற்றம் சாட்டிய பிரதமர் பெஞ்சமின் நெதன்யாகுவுக்கு, இஸ்ரேலின் முக்கிய எதிர்க்கட்சித் தலைவர் காடி ஐசன்கோட் மற்றும் அரபு தலைமைத்துவக் கட்சித் தலைவர்கள் கடும் கண்டனம் தெரிவித்துள்ளனர்.
இஸ்ரேலின் அரபுத் தலைமைத்துவக் கட்சிகள் தேர்தலை "திருடிவிட்டதாக" நெதன்யாகுவின் கட்சி குற்றம் சாட்டியுள்ளது.
அக்கட்சிகள் கட்டார் மற்றும் துருக்கியிடம் இருந்து சட்டவிரோத நிதியுதவியைப் பெற்றனவா? என்பது குறித்து உள்நாட்டுப் பாதுகாப்பு முகமையான ஷின் பெட் (Shin Bet) விசாரணை நடத்தி வருகிறது.
இந்தக் குற்றச்சாட்டுகளை "அர்த்தமற்றவை மற்றும் ஆபத்தானவை" என்று மறுத்துள்ள கட்டார் வெளியுறவுத் துறை அமைச்சகம், தோஹாவிற்கு எதிராக இஸ்ரேலிய அரசியல்வாதிகள் தவறான பிரச்சாரத்தை மேற்கொள்வதாகக் குற்றம் சாட்டியுள்ளது.
இறுதி முடிவுகளின்படி நெதன்யாகுவின் கூட்டணிக்கோ அல்லது யூத எதிர்க்கட்சிகளுக்கோ பாராளுமன்றத்தில் பெரும்பான்மை கிடைக்கவில்லை என்பது உறுதி செய்யப்பட்டுள்ளது.
120 இடங்களைக் கொண்ட நெசெட் (Knesset) பாராளுமன்றத் தேர்தலில், அரபு வாக்காளர்களின் வாக்குப்பதிவு அதிகரித்ததைத் தொடர்ந்து, கூட்டுப் பட்டியல் (Joint List) மற்றும் ரஃஆம் (Ra'am) ஆகிய இரண்டு அரபுத் கூட்டணிகளும் எதிர்பார்ப்புகளைப் பொய்யாக்கி சாதனை அளவாக 19 இடங்களைக் கைப்பற்றியுள்ளன.
இது அவர்களை ஆட்சியைத் தீர்மானிக்கும் 'கிங்மேக்கர்களாக' மாற்றியுள்ளது. தேர்தலில் நெதன்யாகுவின் கூட்டணி 53 இடங்களையும், அவரது போட்டியாளரான காடி ஐசன்கோட்டின் கூட்டணி 48 இடங்களையும் வென்றுள்ளன.
மத்திய தேர்தல் ஆணையத்தின் (CEC) தலைவர், வெளிநாட்டுத் தலையீடு குறித்த "கடுமையான சந்தேகங்கள்" குறித்து விசாரணை நடத்துமாறு ஷின் பெட் பாதுகாப்புச் சேவைக்குக் கோரிக்கை விடுத்ததைத் தொடர்ந்து, அரபுத் தரப்புகளுக்கு வாக்களிக்க வாக்காளர்களுக்கு "இலஞ்சம்" கொடுக்கப்பட்டதாக நெதன்யாகுவின் கட்சி நேற்று குற்றம் சாட்டியது.
இரு அரபுத் தரப்புகளும் இந்தக் குற்றச்சாட்டை உறுதியாக நிராகரித்துள்ளன. அரபு பெரும்பான்மை கூட்டுப் பட்டியல் கூட்டணி இது முற்றிலும் ஆதாரமற்றது என்று கூறியுள்ளது.
அரபுத் தரப்புகளை சட்டவிரோதமானவையாகக் சித்தரித்து, அதன்மூலம் ஐசன்கோட் அவர்களுடன் கைகோர்ப்பதை அரசியல் ரீதியாக இயலாததாக மாற்றுவதற்கான முயற்சியாகவே நெதன்யாகுவின் விமர்சகர்களால் இது பார்க்கப்படுகிறது. ஏனெனில், இதுவே தற்போதைக்கு ஐசன்கோட்டின் கூட்டணி அதிகாரத்தைக் கைப்பற்றுவதற்கான ஒரே வழியாகும்.
அரபு சமூகங்களில் வாக்குப்பதிவை அதிகரிக்கும் நோக்கில் கட்டார் நிதியுதவி வழங்கியதாக மத்திய தேர்தல் ஆணையத்திடம் புகார் அளிக்கப்பட்டதாக இஸ்ரேலிய ஊடகங்கள் செய்தி வெளியிட்டுள்ளன. ஆனால் கட்டார் வெளியுறவு அமைச்சகம் இந்தக் கோரிக்கைகளை "முற்றிலும்" மறுத்துள்ளது.
நெதன்யாகுவும் அவரது லிகூட் கட்சியும் இந்தக் குற்றச்சாட்டுகளை ஒரு "அரசியல் நிலநடுக்கம்" என்றும், தங்களது வலதுசாரி அரசாங்கத்தை அகற்றுவதை நோக்கமாகக் கொண்ட "ஜனநாயகத்தின் மீதான தாக்குதல்" என்றும் சித்தரித்தனர்.
ஆனால், சட்டப்பூர்வமாக வாக்களித்த ஒரு முழு சமூகத்தையும் தங்களது விசாரணை குற்றவாளியாக்கவில்லை என்று ஷின் பெட் பின்னர் தெளிவுபடுத்தியது. அதேவேளையில், "தேர்தல் நேர்மையில் முறையான மீறல்கள் நடந்ததற்கான எந்த ஆதாரமும் இல்லை" என்று மத்திய தேர்தல் ஆணையத்தின் தற்காலிக இயக்குநர் ஜெனரல் டீன் லிவ்னே தெரிவித்தார்.