Nov 19, 2026 - 04:20 PM

யாழ்ப்பாணம் வல்வெட்டித்துறையில் உள்ள தமிழீழ விடுதலைப் புலிகள் இயக்கத்தின் மறைந்த தலைவர் வேலுப்பிள்ளை பிரபாகரனின் பூர்வீக இல்லம் அமைந்திருந்த இடத்துக்கு, விடுதலைச் சிறுத்தைகள் கட்சித் தலைவர் தொல். திருமாவளவன் நேரில் சென்று பார்வையிட்ட சம்பவம் தமிழக அரசியலில் பெரும் சர்ச்சையை ஏற்படுத்தியுள்ளது.
தமிழக முதலமைச்சர் சி. ஜோசப் விஜய் தலைமையிலான கூட்டணி அரசில் அங்கம் வகிக்கும் திருமாவளவனின் இந்தப் பயணம், கூட்டணிக் கட்சியான இந்திய தேசிய காங்கிரஸுக்கு அரசியல் நெருக்கடியை உருவாக்கியுள்ளது.
இது குறித்து பாரதிய ஜனதா கட்சி (பாஜக) கடும் கண்டனம் தெரிவித்துள்ள நிலையில், காங்கிரஸ் கட்சி இதுவரை மௌனம் காத்து வருகிறது.
மறைந்த மூத்த தமிழ் அரசியல்வாதி எம்.கே. சிவாஜிலிங்கத்தின் இறுதிச் சடங்கில் பங்கேற்பதற்காக இலங்கை வந்திருந்த தொல். திருமாவளவன், செம்மணி மனிதப் புதைகுழி நினைவிடத்திற்குச் சென்று அஞ்சலி செலுத்தினார்.
அதனைத் தொடர்ந்து, செவ்வாய்க்கிழமை (17) வல்வெட்டித்துறையில் பிரபாகரன் தனது சிறுவயது காலத்தைக் கழித்த இல்லம் அமைந்திருந்த இடத்துக்கும் அவர் சென்றார்.
அந்த வளாகத்தை அவர் சுற்றிப் பார்க்கும் காணொளிகளையும் சமூக வலைதளங்களில் பகிர்ந்திருந்தார்.
2009ஆம் ஆண்டு உள்நாட்டுப் போர் முடிவுக்கு வந்ததைத் தொடர்ந்து, 2010ஆம் ஆண்டு இலங்கை இராணுவத்தால் பிரபாகரனின் பூர்வீக இல்லம் இடித்துத் தரைமட்டமாக்கப்பட்டது. தற்போது அங்கு வெற்று நிலமும், அவர் வாழ்ந்த இடம் என்பதைக் குறிக்கும் அறிவிப்புப் பலகையும் மட்டுமே உள்ளன.
திருமாவளவனின் இந்தப் பயணத்திற்குத் தமிழக பாஜக தலைமைச் செய்தித் தொடர்பாளர் நாராயணன் திருப்பதி கடும் கண்டனம் தெரிவித்துள்ளார். இது குறித்து அவர் வெளியிட்டுள்ள எக்ஸ் (X) பதிவில், திருமாவளவனின் செயலை "வெட்கக்கேடானது மற்றும் மன்னிக்க முடியாதது" என விமர்சித்துள்ளார்.
பிரபாகரன் ஒரு சுதந்திரப் போராட்ட வீரர் அல்ல என்றும், முன்னாள் பிரதமர் ராஜீவ் காந்தி படுகொலைக்குக் காரணமான தடைசெய்யப்பட்ட பயங்கரவாத அமைப்பின் தலைவர் என்றும் குறிப்பிட்டுள்ள நாராயணன் திருப்பதி, "அவரது இல்லத்திற்குச் செல்லும் எந்தவொரு இந்திய அரசியல் தலைவரும் தமிழர்களுக்கு ஆதரவு தெரிவிக்கவில்லை; மாறாக ராஜீவ் காந்தியின் நினைவை அவமதிக்கிறார்" எனக் குற்றம் சாட்டியுள்ளார்.
இந்த விவகாரத்தைக் கையிலெடுத்துள்ள பாஜக, தமிழக ஆட்சியில் விடுதலைச் சிறுத்தைகள் கட்சியுடன் அதிகாரத்தைப் பகிர்ந்து கொள்ளும் காங்கிரஸ் கட்சியையும் கடுமையாக விமர்சித்துள்ளது.
1991 மே 21 அன்று விடுதலைப் புலிகளின் தற்கொலைப் படைத் தாக்குதலில் முன்னாள் பிரதமரும், அப்போதைய காங்கிரஸ் தலைவருமான ராஜீவ் காந்தி கொல்லப்பட்டதைச் சுட்டிக்காட்டியுள்ள பாஜக, அவரைப் படுகொலை செய்தவரின் இல்லத்திற்குச் சென்ற தலைவரின் கட்சியுடன் காங்கிரஸ் எவ்வாறு கூட்டணி தொடர முடியும் எனக் கேள்வி எழுப்பியுள்ளது.
விடுதலைச் சிறுத்தைகள் கட்சியுடனான கூட்டணியை காங்கிரஸ் முறித்துக் கொள்ள வேண்டும் அல்லது ராஜீவ் காந்தியைக் கொன்றவரைப் பெருமைப்படுத்தும் கட்சியுடன் ஆட்சியில் பங்கேற்ற அரசியல் பழியைச் சுமக்க வேண்டும் என நாராயணன் திருப்பதி வலியுறுத்தியுள்ளார்.
பாஜகவின் இந்தத் தொடர் விமர்சனங்களால் காங்கிரஸ் கட்சி இக்கட்டான சூழலுக்குத் தள்ளப்பட்டுள்ள போதிலும், திருமாவளவனின் பயணம் குறித்தோ அல்லது பாஜகவின் குற்றச்சாட்டுகள் குறித்தோ இதுவரை அதிகாரப்பூர்வமாக எந்தக் கருத்தையும் வெளியிடவில்லை.
மேலும், இந்த விவகாரத்தில் முதலமைச்சர் விஜய்யின் எதிர்வினை என்னவாக இருக்கும் என்பது தமிழக அரசியல் வட்டாரத்தில் பெரும் எதிர்பார்ப்பை ஏற்படுத்தியுள்ளது.

































