பங்களாதேஷ் அணி மேற்கிந்தியாவில் சுற்றுப்பயணம் செய்து 2 டெஸ்ட், 3 ஒருநாள் மற்றும் 3 டி20 போட்டிகள் கொண்ட தொடரில் விளையாடி வருகிறது.

முதலில் நடந்த டெஸ்ட் தொடரில் இரு அணிகளும் 1 - 1 என சமனிலை வகித்தன.

இந்நிலையில், இரு அணிகளுக்கு இடையிலான முதல் ஒருநாள் போட்டி செயிண்ட் கிட்சில் நடைபெறுகிறது.

நாணய சுழற்சியை வென்ற பங்களாதேஷ் முதலில் துடுப்பாட்டத்தை தேர்வு செய்தது. அதன்படி, பங்களாதேஷ் அணி முதலில் களமிறங்கியது.

தொடக்க ஆட்டக்காரர் தன்ஜித் ஹசன் அரை சதமடித்து 60 ஓட்டங்களில் ஆட்டம் இழந்தார். தலைவர் மெஹிதி ஹசன் 74 ஓட்டங்களில் வெளியேறினார்.

கடைசி கட்டத்தில் பொறுப்புடன் ஆடிய மஹமதுல்லா அரை சதம் அடித்து ஆட்டமிழக்காமல் உள்ளார். அரை சதமடிப்பார் என எதிர்பார்த்த நிலையில் ஜேகர் அலி 48 ஓட்டங்களில் ஆட்டமிழந்தார்.

6 வது விக்கெட்டுக்கு இணைந்த மஹமதுல்லா-ஜேகர் அலி ஜோடி 96 ஓட்டங்கள் சேர்த்தது.

இறுதியில், பங்களாதேஷ் நிர்ணயிக்கப்பட்ட 50 ஓவரில் 6 விக்கெட்டுக்கு 294 ஓட்டங்களை எடுத்துள்ளது.

மேற்கிந்திய தீவுகள் சார்பில் ரொமாரியோ ஷெப்பர்ட் 3 விக்கெட்டும், அல்ஜாரி ஜோசப் 2 விக்கெட்டும் வீழ்த்தினர். இதை அடுத்து, 295 ஓட்டங்கள் எடுத்தால் வெற்றி என்ற இலக்குடன் மேற்கிந்திய தீவுகள் அணி களமிறங்குகிறது.