ரஜினி நடிப்பில் 2016-ல் வெளியான கபாலி திரைப்படத்தின் தெலுங்கு தயாரிப்பாளர் கே.பி.சௌத்ரி, கோவாவில் தங்கியிருந்த வாடகை வீட்டில் தூக்கில் தொங்கிய நிலையில் பொலிஸாரால் மீட்கப்பட்டுள்ளார்.

ரஜினி நடித்த கபாலி படத்தை தெலுங்கில் தயாரித்ததன் மூலம் மேலும் பிரபலமாக அறியப்பட்டவர் கே.பி.சௌத்ரி. கோவாவில் சியோலிம் பகுதியில் வாடகை வீட்டில் இவர் வசித்து வந்த நிலையில், நேற்று வெகுநேரமாக அறைக் கதவு திறக்கப்படாமல் இருந்திருக்கிறது. இதனால், அங்கிருந்தவர்கள் சந்தேகித்து உள்ளே நுழைந்தபோது அவர் தூக்கில் தொங்கிய நிலையில் உயிரிழந்து காணப்பட்டதாக கூறப்படுகிறது.

பின்னர், உடனடியாக பொலிஸுக்கு தகவல் தெரிவிக்கப்பட்டிருக்கிறது. அதன்படி அங்கு வந்த பொலிஸார், உடலை மீட்டனர். பொலிஸின் முதற்கட்ட விசாரணையில் அவர் தற்கொலை செய்திருக்கலாம் என்று தெரிவிக்கப்பட்டிருக்கிறது. மேலும், தற்கொலைக்கான காரணம் என்னவென்று அறிய பொலிஸார் தொடர்ந்து விசாரணையில் ஈடுபட்டு வருகின்றனர்.

இந்தச் சம்பவம் குறித்து செய்தியாளர்களிடம் பேசிய பொலிஸ் கண்காணிப்பாளர் அக்ஷத் கௌஷால், அஞ்சுனா பொலிஸ் நிலையத்தின் சியோலிம் புறக்காவல் நிலையத்துக்கு இது குறித்து தகவல் கிடைத்ததாகவும், தற்போது விசாரணை நடைபெற்றுவருவதால் விவரங்கள் சரியான நேரத்தில் பகிரப்படும் என்றும் கூறினார்.

2023-ல் ஆண்டு போதைப்பொருள் வழக்கு தொடர்பாக சைபராபாத் சிறப்பு நடவடிக்கைக் குழு இவரைக் கைது செய்திருந்தது என்பது குறிப்பிடத்தக்கது.