ஃப்ரீஸ்டைல் செஸ் கிரான்ட்ஸ்லாம் போட்டியின் காலிறுதிச் சுற்றில் இந்திய கிராண்ட் மாஸ்டர் குகேஷ் அதிர்ச்சி தோல்வி அடைந்தார். 

நேற்று முன்தினம் (09) தகுதிச் சுற்றில் தோல்வி அடைந்த நிலையில், நேற்றும் (10) தோல்வியைத் தழுவினார். இப்போட்டியில் அடுத்தடுத்து தோல்வி அடைந்ததால் முதல் 4 போட்டியாளர்கள் பட்டியல் இருந்து சறுக்கினார். 

ஃப்ரீஸ்டைல் செஸ் கிரான்ட்ஸ்லாம் போட்டி ஜேர்மனியின் வெய்சன்ஹாஸ் பகுதியில் நடைபெற்று வருகிறது. 

இதில் நேற்று (10) நடைபெற்ற காலிறுதிச் சுற்றில் இந்திய கிரான்ட் மாஸ்டர் டி.குகேஷ், அமெரிக்காவின் ஃபேபியானோ கருவானா உடன் மோதினார். 

ஞாயிற்றுக்கிழமை (9) நடைபெற்ற தகுதிச் சுற்றில் கருவானா உடன் வெள்ளை நிறக் காய்களுடன் ஆடிய குகேஷ் தோல்வியைத் தழுவினார். இதனால் இப்போட்டியில் வெற்றி பெற வேண்டிய கட்டாயத்தில் குகேஷ் களமிறங்கினார். 

விறுவிறுப்பாகத் தொடங்கிய இப்போட்டியின் 6ஆவது நகர்த்தலில் குகேஷ் பின்னடைவைச் சந்தித்தார். 

தொடர்ந்து சமநிலையை நோக்கி ஆட்டம் சென்றுக்கொண்டிருக்கையில், மீண்டும் 17ஆவது நகர்த்தலில் சறுக்கினார் குகேஷ். இதனால் காலிறுதிப் போட்டியிலும் தோல்வி அடைந்தார். 

காலிறுதிப் போட்டியில் தோற்றதன் மூலம் முதல் 4 வீரர்கள் பட்டியலில் இருந்து 8ஆவது இடத்துக்கு குகேஷ் பின்னடைவை சந்தித்துள்ளார்.