அமெரிக்க ஜனாதிபதி டொனால்ட் டிரம்ப் மற்றும் உக்ரைன் ஜனாதிபதி வோலோடிமிர் ஜெலென்ஸ்கி ஆகியோருக்கு இடையே வெள்ளை மாளிகையில் நடந்த சந்திப்பு கடுமையான வாக்குவாதமாக மாறியது. 

நேற்று (28) நடந்த இந்த சந்திப்பு, உக்ரைனின் அரிய புவி தாதுக்கள் தொடர்பான ஒப்பந்தத்தை உறுதி செய்வதற்காக ஏற்பாடு செய்யப்பட்டிருந்தது. ஆனால், இது ஒரு பகிரங்க மோதலாக உருவெடுத்து, இரு தலைவர்களுக்கும் இடையிலான உறவில் பெரும் பிளவை ஏற்படுத்தியுள்ளது. 

டிரம்ப், உக்ரைனுக்கு அமெரிக்கா வழங்கிய இராணுவ மற்றும் நிதி உதவிகளுக்கு ஜெலென்ஸ்கி போதுமான நன்றி தெரிவிக்கவில்லை என்று குற்றம்சாட்டினார். "நீங்கள் அமெரிக்காவை மதிக்கவில்லை. நாங்கள் இல்லையென்றால் உங்களுக்கு எந்த வாய்ப்பும் இல்லை," என்று டிரம்ப் கோபமாக கூறினார். 

மறுபுறம், ஜெலென்ஸ்கி, ரஷ்யாவுடனான போரை முடிவுக்கு கொண்டுவர அமைதி பேச்சுவார்த்தைகள் மட்டுமே தீர்வு என்று அமெரிக்க துணை ஜனாதிபதி ஜே.டி. வான்ஸ் கூறிய கருத்தை எதிர்த்தார். 

"புடின் ஒப்பந்தங்களை மீறி எங்கள் மக்களைக் கொன்றான். எந்த பேச்சுவார்த்தையைப் பற்றி பேசுகிறீர்கள்?" என்று ஜெலென்ஸ்கி கேள்வி எழுப்பினார். 

டிரம்ப், ஜெலென்ஸ்கியை "மூன்றாம் உலகப் போரை தூண்டுபவர்" என்று விமர்சித்து, "ஒப்பந்தம் செய்யாவிட்டால் அமெரிக்கா வெளியேறும்" என்று எச்சரித்தார். 

ஜெலென்ஸ்கி, "எங்களுக்கு அமெரிக்காவின் ஆதரவு தேவை, ரஷ்யாவுடன் இணைந்து இருக்கக் கூடாது" என்று பதிலடி கொடுத்தார். 

வான்ஸ், உக்ரைனில் ஆள் பற்றாக்குறை காரணமாக மக்களை வலுக்கட்டாயமாக போருக்கு அனுப்புவதாகவும், "டிரம்புக்கு நன்றி சொல்ல வேண்டும்" என்றும் கூறினார். 

இதன் காரணமாக சந்திப்பு திட்டமிட்டபடி முடியவில்லை எனவும் தாது ஒப்பந்தம் கையெழுத்தாகவில்லை எனவும் வௌிநாட்டு ஊடகங்கள் செய்தி வௌியிட்டுள்ளன. 

மேலும் ஜெலென்ஸ்கி முன்கூட்டியே வெள்ளை மாளிகையை விட்டு வெளியேறியிருந்தார். பின்னர் டிரம்ப் தனது Truth Social தளத்தில், "ஜெலென்ஸ்கி அமெரிக்காவை அவமதித்தார்" என்று பதிவிட்டார். ஜெலென்ஸ்கி Fox News சேனலுக்கு அளித்த பேட்டியில், "டிரம்புடனான உறவு சரிசெய்யப்படலாம், ஆனால் பகிரங்கமாக இது நடந்தது தவறு" என்று தெரிவித்தார்.