கொமர்ஷல் வங்கியானது தனது தனித்தன்மை பொருந்திய வெளிநாட்டு வங்கிக் கிளையை பெருநிறுவன கிளையாக மாற்றியுள்ளதாக அறிவித்துள்ளது. இது வங்கியானது பெருநிறுவன மற்றும் வர்த்தக வாடிக்கையாளர்களுக்கு அர்ப்பணிப்புள்ள, விரிவான நிதியியல் தீர்வுகளை வழங்குவதற்கான அதன் உறுதிப்பாட்டை மீண்டும் உறுதிப்படுத்துகிறது. 

இந்த மாற்றமானது அதன் புகழ்பெற்ற பயணத்தில் ஒரு புதிய மைல்கல்லை பிரதிநிதித்துவப்படுத்துவதாகவும், பிராந்தியத்தில் ஒரு முக்கிய வர்த்தக மையமாக நீண்ட காலமாக செயல்பட்டு வரும் கொழும்பின் வளமான வர்த்தக பாரம்பரியத்துடன் எதிரொலிப்பதாகவும் வங்கி தெரிவித்துள்ளது. 

இல 21, கொமர்ஷல் ஹவுஸ், கொழும்பு 1, சேர் ரசீக் ஃபரீத் மாவத்தை (பிரிஸ்டல் வீதி) அமைந்துள்ள வங்கியின் தலைமை அலுவலகத்தில் மூலோபாய ரீதியாக அமைந்துள்ள இந்த மீளநாமமிடப்பட்ட பெருநிறுவனக் கிளையானது, இலங்கையில் முதன்முதலாக நிறுவன வாடிக்கையாளர்களின் தேவைகளுக்கு ஏற்றவாறு வடிவமைக்கப்பட்ட ஒரு முதன்மையான நிதி நிலையமாகத் திகழ்வதாக வங்கி தெரிவித்துள்ளது. இந்த மாற்றமானது இணையற்ற சேவைச் சிறப்பு, தனிப்பயனாக்கப்பட்ட நிதியியல் தீர்வுகள் மற்றும் நீண்டகால வர்த்தக பங்குடைமைகளை வளர்த்தல் என்ற வங்கியின் தொலைநோக்குப் பார்வையுடன் இணைந்ததாகவுள்ளது. இந்த மூலோபாய முயற்சி குறித்து கருத்து தெரிவித்த கொமர்ஷல் வங்கியின் முகாமைத்துவப் பணிப்பாளரும்ஃபிரதம நிறைவேற்று அதிகாரியுமான திரு. சனத் மனதுங்க, எங்கள் தலைமை அலுவலகம் அமைந்துள்ள வரலாற்று சிறப்புமிக்க டெல்ஃப்ட் நுழைவாயில், டச்சு கோட்டைக்கு வழிவகுத்தது போல, எமது வங்கிக் கிளையும் இலங்கையின் கடற்கரைகளுக்கு அப்பால் நீடித்த மற்றும் வளமான வர்த்தக ஒத்துழைப்புகளின் புதிய சகாப்தத்தை உருவாக்கும் என்பது எமது நம்பிக்கையாகும், என்று கூறினார். 

தடையற்ற வங்கி அனுபவத்தை வழங்கும் வகையில் வடிவமைக்கப்பட்ட இந்த பெருநிறுவனக் கிளையானது, விரிவான வர்த்தக நிதி, திறைசேரி சேவைகள், வெளிநாட்டு வங்கி, பிற தனிப்பயனாக்கப்பட்ட நிதியியல் தெரிவுகள் மற்றும் நிபுணர் ஆலோசனை ஆதரவு உள்ளிட்ட விரிவான நிதியியல் தீர்வுகளை வழங்குவதுடன் மேலும் உறவு அடிப்படையிலான வங்கிச் சேவையில் புதுப்பிக்கப்பட்ட கவனத்தையும் செலுத்தவுள்ளது. கொமர்ஷல் வங்கியானது உலகின் தலைசிறந்த 1000 வங்கிகளில் பட்டியலிடப்பட்ட முதலாவது இலங்கை வங்கியாகும். மற்றும் கொழும்பு பங்குச் சந்தையில் (CSE) வங்கித் துறையில் அதிக சந்தை மூலதனத்தைக் கொண்டுள்ளது. கொமர்ஷல் வங்கியானது இலங்கையின் சிறிய மற்றும் நடுத்தர தொழில்முயற்சி (SME) துறைக்கு மிகப்பெரிய கடனுதவி வழங்குவதோடு, டிஜிட்டல் கண்டுபிடிப்புகளில் முன்னணியில் உள்ளது. 

அத்துடன் இலங்கையின் முதலாவது 100% கார்பன் நடுநிலை வங்கியாகும். கொமர்ஷல் வங்கியானது நாடளாவிய ரீதியில் அமைந்துள்ள கிளைகள் மற்றும் தானியங்கி இயந்திரங்களின் வலையமைப்பைச் செயல்படுத்துகிறது, மேலும் இலங்கை வங்கிகளுக்கிடையில் பரந்த சர்வதேச தடத்தைக் கொண்டுள்ளது, பங்களாதேஷில் 20 நிலையங்கள், மியன்மாரில் ஒரு நுண்நிதி நிறுவனம் மற்றும் மாலைத்தீவில் பெரும்பான்மையுடன் கூடிய முழு அளவிலான Tier I வங்கி ஆகியவற்றை கொண்டு திகழ்கிறது.வங்கியின் முழு உரித்தான துணை நிறுவனமாக CBC ஃபினான்ஸ் லிமிடெட் திகழ்கிறது. வங்கியானது அதன் சொந்த கிளை வலையமைப்பு மூலம் பரந்த அளவிலான நிதிச் சேவைகளையும் வழங்குகிறது.