இந்தியா - இங்கிலாந்து அணிகளுக்கு இடையிலான 2 ஆவது டெஸ்ட் எட்ஜ்பாஸ்டனில் நடைபெற்று வருகிறது. முதல் இன்னிங்சில் இந்தியா 587 ஓட்டங்கள் குவித்தது. பின்னர் முதல் இன்னிங்சில் விளையாடிய இங்கிலாந்து அனைத்து விக்கெட்டுகளையும் இழந்து 407 ஓட்டங்களை பெற்றது.

180 ஓட்டங்கள் முன்னிலையுடன் இந்தியா 2 ஆவது இன்னிங்சை தொடங்கியது. கடந்த 04 ஆம் திகதி 3 ஆவது நாள் ஆட்ட முடிவில் இந்தியா 1 விக்கெட் இழப்பிற்கு 64 ஓட்டங்களை எடுத்திருந்தது. கே.எல். ராகுல் 28 ஓட்டங்களுடனும், கருண் நாயர் 7 ஓட்டங்களுடனும் களத்தில் இருந்தனர்.

நேற்று (05) 4 ஆவது நாள் ஆட்டம் ஆரம்பமாகியது. கருண் நாயர் 26 ஓட்டங்களில் ஆட்டமிழந்தார்.

மறுமுனையில் கே.எல். ராகுல் சிறப்பாக விளையாடி 78 பந்தில் அரைசதம் அடித்தார். தொடர்ந்து விளையாடிய அவர் 55 ஓட்டங்களில் ஆட்டமிழந்தார்.

3 ஆவது விக்கெட்டுக்கு சுப்மன் கில் உடன் ரிஷப் பண்ட் ஜோடி சேர்ந்தார். ரிஷப் பண்ட் தொடக்கம் முதலே அதிரடி ஆட்டத்தை வெளிப்படுத்தினார். அருக்கு இணையாக சுப்மன் கில்லும் அதிரடி ஆட்டத்தை வெளிப்படுத்தினார். இதனால் ஸ்கோர் மளமளவென உயர்ந்தது.

இந்த ஜோடி 4 ஆவது நாள் மதிய உணவு இடைவேளை வரை ஆட்டமிழக்காமல் விளையாடியது. இதனால் மதிய உணவு இடைவேளை வரை இந்தியா 3 விக்கெட் இழப்பிற்கு 177 ஓட்டங்கள் எடுத்திருந்தது. சுப்மன் கில் 24 ஓட்டங்களுடனும், ரிஷப் பண்ட் 41 (35 பந்துகள்) ஓட்டங்களுடனும் களத்தில் இருந்தனர்.

மதிய உணவு இடைவேளை முடிந்து மீண்டும் ஆட்டம் ஆரம்பமாகியது. ரிஷப் பண்ட் 48 பந்தில் அரைசதம் அடித்தார். சுப்மன் கில் 57 பந்தில் அரைசதம் அடித்தார். ரிஷப் பண்ட் 65 ஓட்டங்களில் ஆட்டமிழந்தார். அடுத்து ஜடேஜா களம் இறங்கினார்.

அரைசதம் அடித்த கில் அதை சதமாக மாற்றினார். அவர் 129 பந்தில் சதம் அடித்தார். மதிய தேனீர் இடைவேளை வரை இந்தியா 4 விக்கெட் இழப்பிற்கு 304 ஓட்டங்களை எடுத்திருந்தது. சுப்மன் கில் 100 ஓட்டங்களுடனும், ஜடேஜா 25 ஓட்டங்களுடனும் களத்தில் இருந்தனர்.

தேனீர் இடைவேளை முடிந்து மீண்டும் ஆட்டம் தொடங்கியது. சுப்மன் கில் மற்றும் ஜடேஜா வாணவேடிக்கை நிகழ்த்தினர். ஜடேஜா 94 பந்தில் அரைசதம் அடித்தார். சுப்மன் கில் 156 பந்தில் 150 ஓட்டங்களை எட்டினர். 27 பந்தில் 100 இல் இருந்து 150 ஓட்டங்களை கடந்தார். தொடர்ந்து விளையாடிய அவர் 162 பந்தில் 161 ஓட்டங்களை எடுத்து ஆட்டமிழந்தார். அப்போது இந்தியா 411 ஓட்டங்களை குவித்திருந்தது.

அடுத்து வந்த நிதிஷ் ரெட்டி 1 ரன்னில் ஆட்டமிழந்தார். 7 ஆவது விக்கெட்டுக்கு ஜடேஜா உடன் வாஷிங்டன் சுந்தர் ஜோடி சேர்ந்தார். இந்தியா 427 ஓட்டங்களை எடுத்திருக்கும்போது 2 ஆவது இன்னிங்சை டிக்ளேர் செய்தது. ஜடேஜா 69 ஓட்டங்களுடனும், வாஷிங்டன் சுந்தர் 12 ஓட்டங்களுடனும் களத்தில் இருந்தனர்.

ஒட்டுமொத்தமாக இந்தியா 607 ஓட்டங்களை முன்னிலைப் பெற்றுள்ளது. இதனால் இங்கிலாந்துக்கு 608 ரன்கள் என்ற இமாலய இலக்கை நிர்ணயித்துள்ளது.