கொமர்ஷல் வங்கியானது இலங்கையின் உள்நாட்டு வங்கிகளில் சிறந்த வங்கியாக 14 வது ஆண்டாக ஆசிய நிதிச் சந்தைகள் தொடர்பான உலகின் முன்னணி தகவல் மூலங்களில் ஒன்றான ஃபினான்ஸ் ஏசியாவால், கௌரவிக்கப்பட்டுள்ளது. 

ஹொங்கொங்கில் நடைபெற்ற ஃபினான்ஸ் ஏசியா விருது விழாவில் கொமர்ஷல் வங்கிக்கு சிறந்த வங்கி விருது வழங்கப்பட்டது. வங்கியின் சார்பாக வங்கியின் பிரதம நிதியியல் அதிகாரி திரு.பிரசன்ன இந்திரஜித் இந்த விருதை ஏற்றுக்கொண்டார். 

“இந்த விருதானது மிகவும் முக்கியத்துவம் வாய்ந்தது, ஏனெனில் இது ஒரு வருடத்தில் வங்கியின் இலங்கை சர்வதேச இறையாண்மை பத்திரங்களின் (SLISBs) மறுசீரமைப்பு உட்பட பல வெளிப்புற காரணிகளின் தாக்கங்களை நிர்வகிப்பதற்கான வங்கியின் செயல்திறனை அடிப்படையாகக் கொண்டது,” என்று கொமர்ஷல் வங்கியின் முகாமைத்துவப்பணிப்பாளரும் பிரதம நிறைவேற்று அதிகாரியுமான திரு. சனத் மனதுங்க கூறினார். “2024 ஆம் ஆண்டில் நாம் பதிவு செய்த விதிவிலக்கான நிதியியல் முடிவுகள், வெளிப்புற சவால்கள் மற்றும் அதன் முக்கிய வங்கி கடமைகளை நிர்வகிப்பதற்கான வங்கியின் விவேகமான அணுகுமுறைக்கும், கடினமான காலங்களில் செயல்பாட்டு மீள்தன்மையை மேம்படுத்தும் திறனுக்கும் ஒரு சான்றாகும். இவை ஃபினான்ஸ் ஏசியா விருதுக்கு பரிசீலிக்கப்பட்ட காரணிகள் ஆகும்.” 

இந்த ஆண்டுக்கான ஃபினான்ஸ் ஏசியா விருதுகளில், கொமர்ஷல் வங்கியுடன் சேர்த்து, அந்தந்த நாடுகளில் சிறந்த உள்நாட்டு வங்கிகளாக தரவரிசைப் படுத்தப்பட்ட பிற நாட்டு விருது வென்ற வங்கிகள் சிட்டி பேங்க் (வங்காளதேசம்), அல்லீட் பேங்க் (பாகிஸ்தான்), பேங்க் ஆஃப் சீனா (ஹொங்கொங்), பிடி பேங்க் மன்டிரி (இந்தோனேசியா), பிடிஓ யூனிபேங்க் (பிலிப்பைன்ஸ்), டெக்காம்பேங்க் (வியட்நாம்) மற்றும் யுனைடெட் ஓவர்சீஸ் பேங்க் (சிங்கப்பூர்) ஆகியவையாகும். 

2024 டிசம்பர் 31 ஆம் திகதி நிலவரப்படி, ரூ.2.876 டிரில்லியன் குழும சொத்துக்கள், ரூ.2.31 டிரில்லியன் வைப்புத்தொகைகள், ரூ.1.53 டிரில்லியன் கடன் புத்தகம் மற்றும் ரூ.274.976 பில்லியன் மொத்த வருமானம் கொண்ட இலங்கையின் மிகப்பாரிய தனியார் துறை வங்கியான கொமர்ஷல் வங்கி, 2024 ஆம் ஆண்டில் தொடர்ந்து நான்காவது ஆண்டாக நாட்டின் சிறிய மற்றும் நடுத்தர நிறுவன (SME) துறைக்கு ஒட்டுமொத்தமாக மிகப்பாரிய கடன் வழங்குநராக தரவரிசைப் படுத்தப்பட்டது. வைப்புத்தொகை, கடன்கள், மொத்த சொத்துக்கள், சந்தை மூலதனம், மொத்த வருமானம் மற்றும் மொத்த மூலதன அடிப்படை ஆகியவற்றில் தனியார் துறை வங்கிகளிடையே அதிக சந்தைப் பங்குகளைக் கொண்ட இலங்கையின் பிரதான தனியார் வங்கியாக கொமர்ஷல் வங்கி தொடர்ந்து திகழ்ந்து வருகிறது. 

உலகின் முதல் 1000 வங்கிகளில் பட்டியலிடப்பட்ட இலங்கையின் முதலாவது வங்கியாக கொமர்ஷல் வங்கி திகழ்வதுடன் கொழும்பு பங்குப் பரிவர்த்தனையில் (CSE) வங்கித் துறையில் அதிக சந்தை மூலதனத்தைக் கொண்டுள்ளது. தனியார் துறையின் மிகப்பாரிய கடன் வழங்குநராக விளங்கும் கொமர்ஷல் வங்கி, SME துறையினருக்கு பாரியளவில் கடனுதவி வழங்கும் கடன் வழங்குநராகவும் உள்ளது. மேலும் டிஜிட்டல் புத்தாக்கங்களில் முன்னணியில் திகழும் இவ்வங்கி இலங்கையின் முதலாவது 100% கார்பன்-நடுநிலைமையை பேணும் வங்கியாகும். கொமர்ஷல் வங்கி நாடளாவிய ரீதியில் மூலோபாய ரீதியாக அமைந்துள்ள கிளைகள் மற்றும் தானியங்கி இயந்திரங்களின் வலையமைப்பை செயற்படுத்தி வருகிறது. 

மேலும், பங்களாதேஷில் 20 கிளைகள், மாலைத்தீவில் பெரும்பான்மையான பங்குகளைக் கொண்ட முழுமையான Tier I வங்கி மற்றும் மியன்மாரில் ஒரு நுண்நிதி நிறுவனத்துடன் சர்வதேச ரீதியில் பரந்தளவில் தடம் பதித்த இலங்கையின் வங்கியாக தன்னை நிலைநிறுத்தியுள்ளது. துபாய் சர்வதேச நிதியியல் நிலையத்தில் (DIFC) பிரதிநிதி அலுவலகத்தை நிறுவுவதற்கு துபாய் நிதியியல் சேவைகள் அதிகாரசபையிடமிருந்து வங்கி அண்மையில் ஒப்புதல் பெற்றதுடன் மேலும் இந்த மைல்கல்லை எட்டிய இலங்கையில் முதல் வங்கியாக தன்னை பதிவு செய்துள்ளது, இது அதன் உலகளாவிய தடத்தை விரிவுபடுத்துவதில் ஒரு குறிப்பிடத்தக்க பங்கிற்கு வழிவகுத்துள்ளது. வங்கியின் முழுமையான உரித்துடைய துணை நிறுவனமான CBC Finance Ltd. அதன் சொந்த கிளை வலையமைப்பு மூலம் பல்வேறு நிதியியல் சேவைகளை வழங்குகிறது.