​பொலிவுட்டில் உருவாகியுள்ள வோர் 2 திரைப்படம் பேன் இந்தியா படமாக நாளை (14) திகதி வெளியாக இருக்கிறது. 

ஹிருத்திக் ரோஷன் கதாநாயகனாக நடித்துள்ள இந்த படத்தில் தெலுங்கு முன்னணி நடிகர் ஜூனியர் என்டிஆர் முதன் முறையாக ஹிந்தியில் அறிமுகமாகிறார். 

இந்தப்படத்தில் அவர் வில்லன் கதாபாத்திரத்திலும் நடித்துள்ளார் என்று சொல்லப்படுகிறது. 

இந்த படம் ரிலீசாக இருப்பதை முன்னிட்டு இதன் பிரமோஷன் நிகழ்ச்சிகள் தொடர்ந்து நடைபெற்று வருகின்றன. 

அப்படி ஐதராபாத்தில் அண்மையில் நடைபெற்ற இந்த படத்தின் பிரமோஷன் நிகழ்ச்சியில் கலந்து கொண்டு ஜூனியர் என்டிஆர் பேசினார். 

அப்போது அவரது பேச்சுக்கு இடையூறாக ரசிகர் ஒருவர் தொடர்ந்து இடையிடையே ஏதோ ஒன்றை சொல்லிக் கொண்டே இருந்தார். 

இதனால் டென்ஷனான ஜூனியர் என்டிஆர், “நான் இப்போது இங்கே பேசட்டுமா? இல்லை இந்த மேடையை விட்டு கிளம்பி போகட்டுமா? இந்த மைக்கை கீழே வைத்து விட்டு கிளம்பி போக எனக்கு ரொம்ப நேரமாகாது. அமைதியாக இருங்கள்” என்று சொன்னதும் தான் அந்த நபர் உள்ளிட்ட பலரின் சலசலப்பு பேச்சுக்கள் அடங்கின.