கடந்த அரசாங்கத்தின் ஆட்சிக் காலத்தில் யுக்திய நடவடிக்கை முன்னெடுக்கப்பட்ட போது, எந்தவொரு நியாயமான காரணமும் இன்றி கிராண்ட்பாஸ் பொலிஸாரால் தம்மை கைது செய்து, போதைப்பொருள் வைத்திருந்ததாகக் குற்றம்சாட்டி விளக்கமறியலில் வைத்ததன் மூலம் தமது அடிப்படை மனித உரிமைகள் மீறப்பட்டதாக 10 கோடி ரூபாய் நட்டஈடு கோரி தந்தை மற்றும் மகன் ஆகியோரால் தாக்கல் செய்யப்பட்ட அடிப்படை மனித உரிமை மனுவை விசாரணைக்கு எடுத்துக்கொள்ள உயர் நீதிமன்றம் நேற்று (20) அனுமதி வழங்கியது. 

இந்த மனுவை கிராண்ட்பாஸ் பிரதேசத்தைச் சேர்ந்த வர்த்தகர்களான தந்தையும் மகனுமான மொஹமட் சுலைமான் மற்றும் இஃப்தான் ரஹ்மத்துல்லா ஆகியோர் தாக்கல் செய்திருந்தனர். 

இந்த மனு தொடர்பாக ஆரம்ப கட்டத்தில் தகவல்களை உறுதிசெய்த பின்னர், நீதியரசர்களான யசந்த கோதாகொட, சோபித ராஜகருணா மற்றும் மேனகா விஜேசுந்தர ஆகியோர் அடங்கிய மூவரடங்கிய உயர் நீதிமன்ற அமர்வு இந்த உத்தரவைப் பிறப்பித்துள்ளது. 

மனுதாரர்கள் குறிப்பிடுகையில், யுக்திய நடவடிக்கை அமுலில் இருந்த கடந்த வருடம் மார்ச் மாதம் 14ஆம் திகதி, தாம் வசித்த அடுக்குமாடிக் குடியிருப்புக்கு வந்து சோதனையிட்டு, தம்மைத் தாக்கி, கைதுசெய்து பொலிஸ் நிலையத்துக்கு அழைத்துச் சென்றதாகக் குறிப்பிட்டுள்ளனர். 

பின்னர், போதைப்பொருள் வைத்திருந்ததாகக் குற்றம் சாட்டி, தம்மை நீதிமன்றத்தில் ஆஜர்படுத்தி விளக்கமறியலில் வைத்ததாகவும் அவர்கள் குற்றம் சாட்டுகின்றனர். 

அதன் பிறகு, நீதிமன்றத்தால் தாம் பிணையில் விடுவிக்கப்பட்டு, பின்னர் குற்றச்சாட்டுகளில் இருந்து விடுவிக்கப்பட்டதாகவும் அவர்கள் சுட்டிக்காட்டுகின்றனர். 

பிரதிவாதிகளின் இந்த நடவடிக்கையால் தமது அடிப்படை மனித உரிமைகள் மீறப்பட்டுள்ளதாகத் தீர்ப்பளிக்குமாறும், அதற்காக ரூபா 10 கோடி நட்டஈடு வழங்குமாறு உத்தரவிடுமாறும் மனுதாரர்கள் மேலதிகமாக உயர் நீதிமன்றத்தில் கோரிக்கை விடுத்துள்ளனர். 

மனுதாரர்கள் சார்பில் சட்டத்தரணி ஹிஜாஸ் ஹிஸ்புல்லா ஆஜரானார்.