புகழ்பெற்ற பொலிவுட் பாடகி ஆஷா போஸ்லே, இதய செயலிழப்பு மற்றும் நுரையீரல் தொடர்பான சிக்கல்கள் காரணமாக இன்று மும்பையில் உள்ள ப்ரீச் கேண்டி வைத்தியசாலையில் அனுமதிக்கப்பட்டுள்ளதாக தெரிவிக்கப்படுகிறது.

இந்திய இசையுலகின் மிகச்சிறந்த குரல்களில் ஒருவரான ஆஷா போஸ்லே, ஏழு தசாப்தங்களுக்கும் மேலான கலைப்பயணத்தைக் கொண்டவர். தனது மூத்த சகோதரி லதா மங்கேஷ்கரின் நிழலில் தனது பயணத்தைத் தொடங்கினாலும், துணிச்சலான, கலகலப்பான மற்றும் பன்முகத்தன்மை கொண்ட தனது தனித்துவமான பாணியால் தனக்கென ஒரு இடத்தைப் பிடித்துக்கொண்டார்.

காதல் பாடல்கள், துள்ளலான மேற்கத்திய பாணி பாடல்கள், கஸல்கள் மற்றும் பொப் இசை என அனைத்து வகைகளிலும் மிக எளிதாகப் பாடும் திறன் கொண்டவர். ஓ.பி. நய்யார் போன்ற இசை அமைப்பாளர்களுடன் இணைந்து "ஆவோ ஹுசூர் தும்கோ" போன்ற காலத்தால் அழியாத பாடல்களை வழங்கிய அவர், ஆர்.டி. பர்மனுடன் இணைந்து "சுரா லியா ஹை தும்னே ஜோ தில் கோ" போன்ற பல வெற்றிப் பாடல்களையும் கொடுத்துள்ளார்.

1990கள் மற்றும் 2000களின் ஆரம்பத்தில் ஆஷா போஸ்லே தன்னை மீண்டும் புதுப்பித்துக் கொண்டார். ஏ.ஆர். ரஹ்மானுடன் இணைந்து “தன்ஹா தன்ஹா” மற்றும் “ரங்கீலா ரே” போன்ற ஹிட் பாடல்களை வழங்கி புதிய தலைமுறை ரசிகர்களையும் கவர்ந்தார். 

 தனது நீண்டகால இசைப் பயணத்திற்காக இந்தியாவின் மிக உயரிய விருதுகளான 'தாதாசாகேப் பால்கே' விருது மற்றும் 'பத்ம விபூஷன்' ஆகியவற்றை அவர் பெற்றுள்ளார். 

மேலும், 'உம்ராவ் ஜான்'  மற்றும் 'இஜாசத்'  போன்ற திரைப்படங்களில் அவரது சிறப்பான பங்களிப்பிற்காக தேசிய திரைப்பட விருதுகளையும் வென்றுள்ளார்.