இந்தியாவின் மேற்கு வங்கத்தில் 152 தொகுதிகளுக்கு கடந்த 23 ஆம் திகதி முதற்கட்டமாக வாக்குப்பதிவு நடைபெற்றது. அப்போது மிகப்பெரிய அளவில் வன்முறை, மோதல், வாக்கு இயந்திரம் சேதப்படுத்துதல் போன்ற சம்பவங்கள் நடைபெறவில்லை. இதனால் எந்தவொரு வாக்குச்சாவடியிலும் மறுவாக்குப்பதிவு நடத்தப்படவில்லை. 

142 தொகுதிகளுக்கான 2 ஆம் கட்ட வாக்குப்பதிவு கடந்த 29 ஆம் திகதி நடைபெற்றது. இதில் வாக்கு இயந்திரத்தில் முறைகேடு நடைபெற்றதாக குற்றம்சாட்டப்பட்டது. பல வாக்குச்சாவடிகளில் பாஜக சின்னம் டேப் ஒட்டி மறைக்கப்பட்டதாக குற்றம்சாட்டப்பட்டது. இதுபோன்று பல்வேறு குற்றச்சாட்டுகள் எழுந்தன. 

இதையடுத்து, இரண்டு தொகுதிகளுக்கான உட்பட்ட 15 வாக்குச்சாவடிகளில் இன்று (02) மறு வாக்குப்பதிவு நடைபெறும் என இந்திய தேர்தல் ஆணையம் அறிவித்து இருந்தது. 

இந்நிலையில் மேற்கு வங்கத்தில் 15 வாக்குச்சாவடிகளில் மறுவாக்குப்பதிவு தொடங்கியது. நாளை மறுநாள் (04) வாக்கு எண்ணிக்கை நடைபெற உள்ள நிலையில் இன்று மறுவாக்குப்பதிவு நடைபெற்று வருகிறது. 

மகர்ஹாத் பாஸ்சிம் தொகுதியில் உள்ள 11 வாக்குச் சாவடிகளிலும், டைமண்ட் ஹார்பர் தொகுதியில் உள்ள 4 வாக்குச் சாவடிகளிலும் காலை 7 மணி முதல் மாலை 6 மணி வரை வாக்குப்பதிவு நடைபெறுகிறது.