வனவாசல மற்றும் களனிக்கு இடைப்பட்ட ரயில் பாதையை எவரோ ஒருவர் சேதப்படுத்தியமையே இன்று (16) காலை இடம்பெற்ற ரயில் தடம் புரண்டமைக்குக் காரணம் என ரயில்வே திணைக்களம் நடத்திய ஆரம்பகட்ட விசாரணைகளில் தெரியவந்துள்ளது.

ரயில்வே திணைக்களத்தினால் நியமிக்கப்பட்ட குழுவினால் மேற்கொள்ளப்பட்ட விசாரணையின் போதே இந்த விடயம் கண்டறியப்பட்டுள்ளதாக ரயில் போக்குவரத்து அதிகாரி அசங்க சமரசிங்க தெரிவித்தார்.

இதன்படி, இச்சம்பவம் தொடர்பாக பொலிஸார் மேற்கொண்ட விசாரணைகளில், ரயில் பாதையின் இரும்புப் பகுதிகளைக் கழற்றிச் சென்ற குற்றச்சாட்டின் பேரில் சந்தேக நபர் ஒருவர் கைது செய்யப்பட்டுள்ளார்.

சம்பவம் தொடர்பாக மேலும் ஒருவரைக் கைது செய்வதற்காக பொலிஸார் விசாரணைகளை மேற்கொண்டு வருவதாகக் குறிப்பிடப்படுகிறது.

இன்று (16) அதிகாலை பொல்கஹவெலயிலிருந்து தெற்கு களுத்துறை நோக்கி பயணித்த ரயிலே வனவாசல மற்றும் களனிக்கு இடையில் தடம் புரண்டுள்ளது.

இதன்போது ரயிலின் 03 பெட்டிகள் தடம் புரண்டுள்ளதுடன், அவற்றில் ஒரு பெட்டி முழுமையாக பாதையை விட்டு விலகி தலைகீழாகக் கவிழ்ந்திருந்ததாக அத தெரண செய்தியாளர் தெரிவித்தார்.

இந்த விபத்தில் 10 ரயில் பயணிகள் காயமடைந்துள்ளதுடன், அவர்களில் ஐவர் கொழும்பு தேசிய வைத்தியசாலையில் அனுமதிக்கப்பட்டு சிகிச்சை பெற்று வருகின்றனர்.

இந்த விபத்து குறித்து கருத்து தெரிவித்த ரயில் போக்குவரத்து அதிகாரி அசங்க சமரசிங்க:

"இந்த தடம் புரள்வு ஏற்பட்டுள்ள இடத்தில், கொழும்பு திண்மக் கழிவுப் போக்குவரத்து மத்திய நிலையத்திற்காக அமைக்கப்பட்ட ரயில் பாதை ஒன்று உள்ளது. அங்கு பிரதான பாதையிலிருந்து பிரியும் ஒரு பாதை உள்ளது. அந்தப் பிரிந்து செல்லும் இடத்திலேயே இந்த தடம் புரள்வு ஏற்பட்டுள்ளது. இது குறித்து திணைக்கள மட்டத்தில் விசாரணைக் குழுவொன்று நியமிக்கப்பட்டுள்ளது. அத்துடன், இது தொடர்பாக நாங்கள் இலங்கை பொலிஸிலும் முறைப்பாடு செய்துள்ளோம். மேலும், வெளிநபர் ஒருவர் பாதையிலிருந்த பகுதிகளைக் கழற்றிச் சென்றமையே இந்த தடம் புரள்வுக்குக் காரணமாகும். அது தொடர்பாக அந்தச் சந்தேக நபர் தற்போது பொலிஸாரால் கைது செய்யப்பட்டுள்ளார். பொலிஸார் இது குறித்து மேலதிக விசாரணைகளை நடத்தி வருகின்றனர். திணைக்கள மட்டத்திலும் ஒரு குழு நியமிக்கப்பட்டுள்ளது. தற்போது தண்டவாளத்தில் மீண்டும் ரயிலை நிறுத்தும் பணிகள் நிறைவடைந்துள்ளன. தடம் புரண்ட ரயிலை இன்னும் சற்று நேரத்தில் கொழும்பு நோக்கி இயக்குவதற்கு எதிர்பார்க்கிறோம். அதன் பின்னர் சேதமடைந்த பாதையை சீரமைக்க வேண்டியுள்ளது. அந்தப் பணிகளும் தற்போது ஆரம்பிக்கப்பட்டுள்ளன."

எவ்வாறாயினும், ரயில் பாதைகள் முறையாகப் பராமரிக்கப்படாமையே இந்த நிலைமைக்குக் காரணம் என லோகோமோட்டிவ் ஒபரேட்டிங் இன்ஜினியர்ஸ் சங்கத்தின் செயலாளர் எஸ்.ஆர்.சி.எம். சேனாநாயக்க தெரிவித்தார்.

அங்கு கருத்து தெரிவித்த எஸ்.ஆர்.சி.எம். சேனாநாயக்க:

"பாதையின் நிலையை மிகச் சிறப்பாக அறிந்துகொள்ளக்கூடிய தகுதியான நபர் ரயில் எஞ்சின் சாரதியே ஆவார். ஏனெனில், ஒரு நாளில் குறிப்பிட்ட பயணங்கள் நிறைவடைந்த பின்னர் பாதையின் சரியான நிலையை அறிந்துகொள்வதற்கான சிறந்த வழி, இது குறித்து ரயில் சாரதிகளிடம் வினவுவதாகும்.  பல சமிக்ஞை குறைபாடுகளை ரயில் சாரதிகள் கண்டறிந்து அவற்றை அறிவித்ததன் மூலம் பல விபத்துக்கள் தடுக்கப்பட்டுள்ளன. இந்தச் சம்பவம் நடப்பதற்கு முன்னரும், இன்று காலையும்கூட அங்கு சமிக்ஞை பிரச்சினை ஒன்று இருப்பதாக ஒரு ரயில் சாரதி எங்களுக்கு அறிவித்திருந்தார். இவற்றைச் சரியாகச் செய்து, சம்பந்தப்பட்ட அதிகாரிகள் இந்த ரயில் எஞ்சின் சாரதிகளுடன் கலந்துரையாடலை ஏற்படுத்தாத இந்தச் சிக்கலை நாங்கள் தொடர்ச்சியாகக் குறிப்பிட்டு வருகிறோம். இது இத்துடன் முடிவடையும் என்று நாங்கள் நினைக்கவில்லை. ஏனெனில், இந்தப் பாதைகளின் நிலைமை மிகவும் ஆபத்தான கட்டத்தை எட்டியுள்ளது. இதற்கு மேலதிகமாக, இந்த ரயில்களின் நிலையும் இயங்குவதற்குப் பொருத்தமற்ற நிலையிலேயே உள்ளன. அவ்வாறான நிலையில் இவற்றை இயக்கத்தில் ஈடுபடுத்துவதால் ஏற்படும் விளைவுகளால் எதிர்காலத்தில் கணிசமான சிக்கல்கள் ஏற்படக்கூடும்."

"வனவாசல ரயில் நிலையத்தில் இந்த ரயிலை நிறுத்தி, மீண்டும் பயணத்தை ஆரம்பித்த உடனேயே இந்த ரயில் தடம் புரண்டுள்ளது. வேகம் மணிக்கு 10 முதல் 20 கிலோமீற்றர் வரை இருந்திருக்கலாம். 'சாகரிகா' ரயில் தடம் புரண்ட சந்தர்ப்பத்தில், ரயிலின் வேகம் அதிகம், அது தொடர்பான பிரச்சினைகள் உள்ளன என திணைக்களத் தரப்பிலிருந்து பெரிய கதைகள் பேசப்பட்டன. ஆனால், இப்போது மணிக்கு 20 கிலோமீற்றருக்கும் குறைவான வேகத்தில் பயணித்த ரயில் தடம் புரண்டபோது ஏற்பட்டுள்ள நிலையை இன்று உங்களால் காண முடிகிறது. இது குறித்து நாங்கள் தொடர்ச்சியாக விழிப்புணர்வு ஏற்படுத்தி வருகிறோம். பல வருடங்களாக இந்தப் பாதைப்பணிகளைச் சரியாக மேற்கொள்ளுமாறு கோரிக்கை விடுத்துள்ளோம், ஆனால் சம்பந்தப்பட்ட அதிகாரிகளோ அல்லது நிர்வாகமோ அதற்குச் செவிசாய்ப்பதில்லை. அதன் விளைவாகவே இந்தச் சம்பவமும் நடந்துள்ளது."

அதேபோல், இது குறித்து ரயில் நிலைய அதிபர்கள் சங்கத்தின் சுமேத சோமரத்னவும் கருத்து வெளியிட்டார்:

"தற்போது பயணியருக்கு ரயில் பயணம் குறித்து கடுமையான பிரச்சினை எழுந்துள்ளது. இதற்கான தீர்வுகள் திணைக்கள மட்டத்தில் சரியாக நடப்பதாக எங்களுக்குத் தெரியவில்லை. அமைச்சர் பல்வேறு கதைகளைக் கூறிச் சென்றாலும் தெளிவான எதுவும் இல்லை. குறைந்தபட்சம் இவ்வாறான சூழ்நிலையில், பயணிகளின் உயிர்ப் பாதுகாப்பிற்காக பயணிகளுக்கு ஒரு சிறப்பு காப்புறுதித் திட்டத்தையாவது வழங்குவதற்குக் நடவடிக்கை எடுக்குமாறு அரசாங்கத்திற்கு நாங்கள் முன்மொழிகிறோம். எப்போதும் 'அட்டுவவை (பரணை) உடைத்து நாற்காலி செய்யும்' கதையாகவே நடக்கிறது. இந்த முறையிலிருந்து விடுபட்டு, இவற்றைச் சரியான முறையில் பராமரிக்குமாறு நாங்கள் தொடர்ச்சியாகக் கூறி வருகிறோம், ஆனால் அது நடக்கவில்லை. இன்று கூற வேண்டிய வருத்தமான விடயம் என்னவென்றால், திணைக்களம் 'அட்டுவவும் இல்லை, நாற்காலியும் இல்லை' என்ற நிலைக்குத் தள்ளப்பட்டுள்ளது. அமைச்சரும் பிரதி அமைச்சரும் தண்டவாளத்தில் விழுந்திருக்கலாம், ஆனால் பயணிகளும் ஊழியர்களுமாகிய நாங்கள் தண்டவாளத்திற்கு வெளியேயே விழுந்துள்ளோம்."