கிரிக்கெட் உலகில் எப்போதும் ஹாட் டாப்பிக்காக இருக்கும் எம்.எஸ். தோனியின் ஐபிஎல் ஓய்வு குறித்த விவாதங்கள் மீண்டும் சூடுபிடித்துள்ளன. தோனி தனது ஓய்வு முடிவை தள்ளிப்போட்டு, அடுத்த சீசனிலும் (IPL 2027) களம் காண வாய்ப்புள்ளதாக இந்திய அணியின் முன்னாள் நட்சத்திர வீரர் ஜாகீர் கான் தெரிவித்துள்ளார். 

நடப்பு ஐபிஎல் தொடர் தோனி மற்றும் சிஎஸ்கே அணிக்கு மிகவும் சவாலான ஒன்றாக அமைந்தது. சிஎஸ்கே அணி மூன்றாவது முறையாக பிளே-ஆஃப் சுற்றுக்குத் தகுதி பெறத் தவறியதுடன், தோனி தொடர் காயங்களால் அவதிப்பட்டார். சீசனுக்கு முன்பே ஏற்பட்ட கணுக்கால் (Calf) காயம் காரணமாக ஆரம்ப கட்டப் போட்டிகளைத் தவறவிட்ட அவர், பின்னர் ஏற்பட்ட கட்டைவிரல் காயம் காரணமாகப் போட்டிகளில் இருந்து முற்றிலும் விலக நேர்ந்தது. 

இந்தச் சூழலில், தோனியின் அடுத்தகட்ட நகர்வு குறித்து கிரிக்பஸ் தளத்தில் பேசிய ஜாகீர் கான், "தோனி வழக்கமாகச் செய்வது போல, இந்த இடைவேளைக் காலத்தை தனது உடல்நிலையைக் கண்காணிக்கப் பயன்படுத்துவார். சிஎஸ்கே அணி தற்போது இளம் வீரர்களை உருவாக்குவதிலும், அன்கேப்டு வீரர்களுக்கான இடங்களைப் பயன்படுத்துவதிலும் அதிக கவனம் செலுத்தி வருகிறது. 

கடந்த முறை தோனி தன்னை ஒரு அன்கேப்டு வீரராகப் பயன்படுத்த சிஎஸ்கே-வுக்கு அனுமதி அளித்தது போல, அணியின் எதிர்காலத்தைக் கொண்டு செல்லும் ஒரு சரியான வீரர் கிடைக்கும் பட்சத்தில், அவரும் அணியும் இணைந்து ஒரு நல்ல முடிவை எடுப்பார்கள். மெகா ஏலத்திற்கு முன்னதாக அவர் தனது இறுதி முடிவை அறிவிப்பார்" என்று கூறியுள்ளார். 

ஜாகீர் கானின் இந்த கருத்தை வரவேற்று பேசியுள்ள முன்னாள் இந்திய சுழற்பந்து வீச்சாளர் முரளி கார்த்திக், தோனியின் மனதில் என்ன இருக்கிறது என்பதை யாராலும் கணிக்க முடியாது என்று தெரிவித்துள்ளார். 

தனது கிரிக்கெட் வாழ்க்கை முழுவதும் பல அதிரடி முடிவுகளை எடுத்து உலகையே ஆச்சரியப்படுத்தியவர் தோனி. அவரது வயது மற்றும் சமீபத்திய காயங்களைக் கணக்கில் கொண்டு பலர் அவர் ஓய்வு பெற்றுவிடுவார் என்று கருதினாலும், தோனிக்கும் சிஎஸ்கே ரசிகர்களுக்கும் இடையே உள்ள பிணைப்பு என்பது வெறும் கிரிக்கெட் லாஜிக்கிற்கு அப்பாற்பட்டது. 

தோனியின் ஓய்வு குறித்து முரளி கார்த்திக் தெரிவிக்கையில், "தோனி எப்போதுமே தனது முடிவுகளை ரகசியமாக வைத்திருப்பவர். நாம் நாள் முழுவதும் விவாதித்தாலும் அவரால் மட்டுமே இறுதி முடிவை எடுக்க முடியும். அவரது வயது ஒரு தடையாக இருக்காது, அவர் மீண்டும் மஞ்சள் உடையில் களம் காண்பார் என்றும் ரசிகர்களைப் போல நானும் நம்புகிறேன்" என்று தெரிவித்துள்ளார். 

தோனி விளையாடுவது குறித்த இறுதி முடிவு, இந்த 7-8 மாதகால இடைவேளையில் அவரது உடல்நிலை எவ்வாறு ஒத்துழைக்கிறது என்பதைப் பொறுத்தே அமையும் என்பதால், சிஎஸ்கே ரசிகர்கள் அனைவரும் பெரும் எதிர்பார்ப்புடன் காத்திருக்கின்றனர்.