கொழும்பு எஸ்.எஸ்.சி மைதானத்தில் நடைபெற்று வரும் இலங்கை மற்றும் இந்திய அணிகளுக்கிடையிலான 2-வது டெஸ்ட் போட்டியின் இரண்டாம் நாள் ஆட்டநேர முடிவில், இந்திய அணி தனது முதல் இன்னிங்ஸில் 503 ஓட்டங்கள் குவித்து இமாலய நிலையில் உள்ளது. 

பதிலுக்குத் தனது முதல் இன்னிங்ஸைத் தொடங்கிய இலங்கை அணி, இரண்டாம் நாள் முடிவில் 2 விக்கெட்டுகளை இழந்து 8 ஓட்டங்களை மட்டுமே எடுத்துத் தடுமாறி வருகிறது.

முதல் நாள் ஆட்டநேர முடிவில் 5 விக்கெட் இழப்பிற்கு 300 ஓட்டங்கள் எடுத்திருந்த இந்திய அணி, இரண்டாம் நாளில் தனது வலுவான ஆட்டத்தைத் தொடர்ந்தது. தொடக்க ஆட்டக்காரர் தேவ்தத் படிக்கல் 117 ஓட்டங்கள் எடுத்திருந்த நிலையில், இரண்டாம் நாளில் களத்தில் அசத்திய துருவ் ஜூரெல் 177 பந்துகளில் 115 ஓட்டங்கள் எடுத்து ஆட்டமிழக்காமல் களத்தில் இருந்தார்.

முன்னதாகக் காயம் காரணமாகத் தற்காலிகமாக வெளியேறியிருந்த ரிஷப் பண்ட் மீண்டும் களமிறங்கி, அதிரடியாக 63 ஓட்டங்கள் சேர்த்தார். இதற்கமைய இந்திய அணி தனது முதல் இன்னிங்ஸில் 9 விக்கெட் இழப்பிற்கு 503 ஓட்டங்கள் குவித்திருந்த போது தனது இன்னிங்ஸை இடைநிறுத்திக்  கொண்டது.

இலங்கை அணியின் பந்துவீச்சில் வேகப்பந்து வீச்சாளர் அசித பெர்னாண்டோ சிறப்பாகச் செயல்பட்டு 4 விக்கெட்டுகளைக் கைப்பற்றினார். அத்துடன் கேசர நுவந்த மற்றும் பிரபாத் ஜெயசூர்யா ஆகியோர் தலா 2 விக்கெட்டுகளை வீழ்த்தினர்.

இதனைத் தொடர்ந்து தனது முதல் இன்னிங்ஸைத் தொடங்கிய இலங்கை அணிக்கு ஆரம்பத்திலேயே அதிர்ச்சி காத்திருந்தது.

தொடக்க ஆட்டக்காரர் லஹிரு உடாரா 1 ஓட்டத்தில் பிரசித் கிருஷ்ணா பந்துவீச்சிலும், பிரபாத் ஜெயசூர்யா 2 ஓட்டங்களில் மானவ் சுதர் பந்துவீச்சிலும் அடுத்தடுத்து ஆட்டமிழந்து வெளியேறினர்.

மந்தமான வெளிச்சம் காரணமாக இரண்டாம் நாள் ஆட்டம் முன்னதாகவே முடித்துக்கொள்ளப்பட்ட போது, இலங்கை அணி 3 ஓவர்களில் 2 விக்கெட் இழப்பிற்கு 8 ஓட்டங்கள் எடுத்திருந்தது. தற்போது களத்தில் கமிலா மிஷார 5 ஓட்டங்களுடன் நிற்க, இலங்கை அணி இந்திய அணியை விட 495 ஓட்டங்கள் பின்தங்கிய நிலையில் உள்ளது.