லங்கா ஹொஸ்பிட்டல்ஸ் பிஎல்சி நிறுவனம், Joint Commission International (JCI)-இன் 8 வது பதிப்புத் தரநிலைகளின் கீழ் மீள் அங்கீகாரத்தைப் பெற்றுள்ளது. தற்போதைய சர்வதேசத் தேவைகளுக்கு ஏற்ப, பாதுகாப்பான மற்றும் நம்பகமான நோயாளர் பராமரிப்பை வழங்குவதில் இந்நிறுவனம் கொண்டுள்ள தொடர்ச்சியான அர்ப்பணிப்பை இந்த அங்கீகாரம் பிரதிபலிக்கிறது. 

இந்தச் சாதனை என்பது ஒரு உலகளாவிய அங்கீகார மதிப்பாய்வை வெற்றிகரமாக நிறைவு செய்வதை விட மேலானது. இது மருத்துவ, நிர்வாக மற்றும் செயல்பாட்டுப் பிரிவுகள் அனைத்திலும் கடுமையான தரம் மற்றும் பாதுகாப்பு நடைமுறைகள் ஒருங்கிணைக்கப்பட்டுள்ளதை வெளிப்படுத்துகிறது. இதற்குத் தொடர்ச்சியான கண்காணிப்பு, சான்றுகள் சார்ந்த வழிமுறைகள், பொறுப்புணர்வுள்ள தலைமைத்துவம் மற்றும் மருத்துவமனை முழுவதும் நிலவும் தொடர் மேம்பாட்டு கலாச்சாரம் ஆகியவை உறுதுணையாக உள்ளன. 

JCI என்பது உலகளவில் மிகவும் கடுமையான சுகாதார அங்கீகார அமைப்புகளில் ஒன்றாக அங்கீகரிக்கப்பட்டுள்ளது. இதன் 8-வது பதிப்பானது, நோயாளர் பராமரிப்பு, தொற்றுத் தடுப்பு மற்றும் கட்டுப்பாடு, மருந்துகள் முகாமைத்துவம், வசதிகளின் பாதுகாப்பு, மருத்துவப் பணியாளர்களின் தகுதி மற்றும் திறன்கள், துல்லியமான தரவு முகாமைத்துவம், நிர்வாகம் மற்றும் இடர் முகாமைத்துவம் ஆகிய அனைத்து நிலைகளிலும் வலுவான தேவைகளை அறிமுகப்படுத்துகிறது. வெறும் கொள்கை அளவில் மட்டும் குறிப்பிடப்படாமல், அன்றாட நடைமுறைகளில் தரம் மற்றும் நோயாளர் பாதுகாப்பு ஆகியவை தொடர்ந்து பேணப்படுகின்றனவா என்பதையும், அவை அளவிடக்கூடிய பெறுபேறுகளால் உறுதிப்படுத்தப்படுகின்றனவா என்பதையும் இத்தரநிலைகள் மதிப்பிடுகின்றன. 

லங்கா ஹொஸ்பிட்டல்ஸின் இந்த சமீபத்திய அங்கீகாரம், JCI தனது முதல் மூவாண்டு ஆய்வுக் காலத்தில் இலங்கையில் மீண்டும் அங்கீகாரம் பெற்ற முதல் மருத்துவ நிறுவனம் என்ற அதன் முந்தைய சிறப்பம்சத்தின் தொடர்ச்சியாகும். இந்தத் தொடர்ச்சியான வெற்றி, நீண்டகாலமாக நிலைத்திருக்கும் ஒரு தரமான கலாச்சாரத்தையும், அடுத்தடுத்த அங்கீகாரக் காலங்கள் மூலம் சர்வதேச அளவில் அங்கீகரிக்கப்பட்ட தரநிலைகளைப் பேணுவதில் நிறுவனத்தின் அர்ப்பணிப்பையும் வெளிப்படுத்துகிறது. 

இந்த மீள் அங்கீகாரம், மருத்துவமனையின் அமைப்புகள் பாதுகாப்பான, ஒருங்கிணைக்கப்பட்ட மற்றும் நோயாளர் மையப்படுத்தப்பட்ட கவனிப்பை ஆதரிக்கும் வகையில் வடிவமைக்கப்பட்டுள்ளன என்ற சுயாதீனமான உறுதியை நோயாளர்கள், குடும்பங்கள், நிறுவன வாடிக்கையாளர்கள், காப்பீட்டாளர்கள் மற்றும் சுகாதாரப் பங்காளர்களுக்கு வழங்குகிறது. மேலும், நோயாளரின் பயணத்தின் ஒவ்வொரு கட்டத்திலும், அதாவது மதிப்பீடு மற்றும் நோயறிதல் முதல் சிகிச்சை, கண்காணிப்பு, வெளியேற்றம் மற்றும் பின்தொடர்தல் வரை, மருத்துவப் பொறுப்புக்கூறலின் முக்கியத்துவத்தையும் இது வலுப்படுத்துகிறது. 

லங்கா ஹொஸ்பிட்டல்ஸ் மருத்துவ சேவைகள் குழுமப் பணிப்பாளர் வைத்தியர் சஞ்சய ரத்நாயக்க கூறுகையில், “மருத்துவ நிபுணத்துவம் தீர்க்கதரிசனம் கொண்ட நிர்வாகத்துடன் இணையும்போதுதான் உண்மையான சுகாதாரச் சிறப்பு எட்டப்படுகிறது. இந்த மீள் அங்கீகாரம், நமது மருத்துவர்கள், தாதியர்கள், துணை சுகாதார தொழில் வல்லுநர்கள், செயல்பாட்டுக் குழுக்கள் மற்றும் தலைமைத்துவத்தின் கூட்டு ஒழுக்கத்தையும் அர்ப்பணிப்பையும் பிரதிபலிக்கிறது. மிக முக்கியமாக, லங்கா ஹொஸ்பிட்டல்ஸில் வழங்கப்படும் கவனிப்பின் ஒவ்வொரு அம்சத்திலும் பாதுகாப்பு, தரம் மற்றும் பொறுப்புக்கூறல் ஆகியவை பொதிந்துள்ளன என்ற நம்பிக்கையை இது நோயாளர்களுக்கு வழங்குகிறது. 

JCI 8 வது பதிப்பின் ஒரு முக்கிய அம்சம், சுற்றுச்சூழல் பொறுப்பு மற்றும் நிறுவனத்தின் மீள்திறன் ஆகியவற்றில் அது அதிக கவனம் செலுத்துவதாகும். லங்கா ஹொஸ்பிட்டல்ஸைப் பொறுத்தவரை, தெளிவான தலைமைப் பொறுப்பு, ஊழியர்களின் தீவிரப் பங்கேற்பு மற்றும் அதன் சுற்றுச்சூழல் தாக்கத்தைக் குறைப்பதற்கான நடைமுறை நடவடிக்கைகள் ஆகியவற்றுடன், நிலைபேற்றியலை அதன் செயல்பாடுகளின் மையத்தில் வைப்பதே இதன் பொருளாகும். 

இந்த எதிர்பார்ப்புகளில், கழிவுகள், காபன் மற்றும் வள நுகர்வு ஆகியவற்றின் கட்டமைக்கப்பட்ட கண்காணிப்பு, பொறுப்பான கொள்முதல் நடைமுறைகளைச் செயல்படுத்துதல் மற்றும் செயல்பாட்டுத் திட்டமிடலில் சுற்றுச்சூழல் சார்ந்த அம்சங்களை ஒருங்கிணைத்தல் ஆகியவை அடங்கும். இந்தத் தேவைகளைப் பூர்த்தி செய்வதன் மூலம், உலகத் தரம் வாய்ந்த சுகாதாரப் பராமரிப்பின் தரம் என்பது மருத்துவ பெறுபேறுகளுக்கு அப்பாற்பட்டு, சுகாதாரச் சூழலின் பொறுப்பான மற்றும் நிலைபேற்றியல் கொண்ட முகாமைத்துவம் வரை நீட்டிக்கப்படுகிறது என்பதை லங்கா ஹொஸ்பிட்டல்ஸ் நிரூபித்துள்ளது. 

இந்த மீள் அங்கீகாரம், லங்கா ஹொஸ்பிட்டல்ஸ் வழங்கும் பராமரிப்பில் நோயாளர்களுக்கும் கூட்டாளர்களுக்கும் அதிக நம்பிக்கையை அளிக்கிறது. மேலும், மருத்துவமனை முழுவதும் பாதுகாப்பு மற்றும் தரத்தின் உயர் தரநிலைகளைப் பேணிப் பராமரிப்பதில் அதன் குழுக்களின் தினசரி அர்ப்பணிப்பையும் இது பிரதிபலிக்கிறது. 

லங்கா ஹொஸ்பிட்டல்ஸ் தொடர்பான விபரங்கள் 

இலங்கையின் தனியார் சுகாதாரத் துறையில் முன்னோடியாகத் திகழும் லங்கா ஹொஸ்பிட்டல்ஸ், மேம்பட்ட மருத்துவத் தொழில்நுட்பம் மற்றும் சர்வதேச அளவில் அங்கீகரிக்கப்பட்ட சுகாதாரத் தரநிலைகளை அறிமுகப்படுத்துவதில் அர்ப்பணிப்புடன் செயல்பட்டு வருகிறது. மருத்துவ நிபுணத்துவம் மற்றும் உட்கட்டமைப்பில் தொடர்ந்து முதலீடுகளை மேற்கொள்வதன் மூலம், இலங்கை மற்றும் பரந்த பிராந்தியத்திற்கு உலகத்தரம் வாய்ந்த சுகாதார சேவைகளை வழங்குவதில் இந்நிறுவனம் உறுதியுடன் உள்ளது.