தமிழகத்தில் நடந்து முடிந்த சட்டப்பேரவைத் தேர்தலுக்குப் பிறகு அ.தி.மு.கவில் ஏற்பட்ட சலசலப்பு காரணமாக, மதுராந்தகம் தொகுதி எம்.எல்.ஏ மரகதம் குமரவேல் மற்றும் தாராபுரம் தொகுதி எம்.எல்.ஏ சத்தியபாமா ஆகியோர் தங்களது பதவிகளை ராஜினாமா செய்துவிட்டு த.வெ.கவில் இணைந்தனர். 

இதனால் காலியானதாக அறிவிக்கப்பட்ட இவ்விரு தொகுதிகளுக்கும், புதுச்சேரியின் தட்டாஞ்சாவடி தொகுதிக்கும் இன்று இடைத்தேர்தல் நடைபெற்றது.

மதுராந்தகத்தில் 285 வாக்குச்சாவடிகளிலும், தாராபுரத்தில் 302 வாக்குச்சாவடிகளிலும் காலை 7 மணிக்குத் தொடங்கிய வாக்குப்பதிவு மாலை 6 மணியுடன் நிறைவடைந்தது. 

த.வெ.க, தி.மு.க, அ.தி.மு.க, இடதுசாரிகள் மற்றும் நாம் தமிழர் கட்சி என ஐந்து முனைப் போட்டி நிலவிய இந்த இடைத்தேர்தலில், பொதுமக்கள் காலை முதலே நீண்ட வரிசையில் நின்று ஆர்வத்துடன் வாக்களித்தனர். 

தேர்தல் தொடங்கியதும் முக்கியக் கட்சிகளின் வேட்பாளர்களும் தங்களது வாக்குச்சாவடிகளில் வாக்குகளைப் பதிவு செய்தனர்.

நாள் முழுவதும் வாக்குப்பதிவு மிக விறுவிறுப்பாக நடைபெற்ற நிலையில், மாலை 5 மணி நிலவரப்படி மதுராந்தகம் தொகுதியில் 83.86 சதவீத வாக்குகளும், தாராபுரம் தொகுதியில் 78.53 சதவீத வாக்குகளும் பதிவாகின. 

அதேபோல புதுச்சேரி மாநிலம் தட்டாஞ்சாவடியில் 78.83 சதவீத வாக்குகள் பதிவாகியிருந்தன.

இந்த நிலையில், வாக்கு எண்ணும் பணிகள் எதிர்வரும் 9 ஆம் திகதி ஆரம்பமாகும் என அறிவிக்கப்பட்டுள்ளது.