Nov 11, 2026 - 12:12 PM
By மட்டக்களப்பு நிருபர் சரவணன்
By மட்டக்களப்பு நிருபர் சரவணன்
மட்டக்களப்பு மாவட்டத்தில் போதைப்பொருள் மற்றும் மதுபானம் அருந்திவிட்டு வாகனங்களைச் செலுத்தும் சாரதிகளைக் கண்டறியும், விசேட நடவடிக்கை இன்று (11) மட்டக்களப்பு பிரதான பேருந்து நிலையப் பகுதியில் முன்னெடுக்கப்பட்டு வருகின்றது.
மாவட்ட போக்குவரத்துப் பிரிவு பொலிஸார், தேசிய போக்குவரத்து வைத்திய நிறுவனத்துடன் இணைந்து வீதிகளில் பயணிக்கும் வாகனங்களை நிறுத்தி, சாரதிகளை நடமாடும் மருத்துவப் பரிசோதனைக்கு உட்படுத்தி வருகின்றனர் என மாவட்ட போக்குவரத்து பொலிஸ் பிரிவுப் பொறுப்பதிகாரி, பொலிஸ் பரிசோதகர் குணதிலக்க தெரிவித்தார்.
நாட்டில் நாளுக்கு நாள் அதிகரித்து வரும் வீதி விபத்துகளில் பலர் உயிரிழந்து வருகின்றனர். இவ்வாறான விபத்துகளைத் தடுப்பதற்கான விசேட திட்டத்தின் கீழ், போதைப்பொருள் மற்றும் மதுபோதையில் வாகனங்களைச் செலுத்தும் சாரதிகளைக் கண்டறியவே இந்த நடமாடும் மருத்துவப் பரிசோதனை நடவடிக்கை மேற்கொள்ளப்பட்டு வருகின்றது.
இதற்கமைய, மட்டக்களப்பு நகரின் முக்கிய சந்திகளில் போக்குவரத்துப் பொலிஸார் கடமையில் ஈடுபடுத்தப்பட்டு, மோட்டார் சைக்கிள்கள் முதல் கனரக வாகனங்கள் வரை நிறுத்திச் சோதனையிடப்பட்டு வருகின்றன.
தேசிய போக்குவரத்து வைத்திய நிறுவனத்தின் நடமாடும் பேருந்து, மட்டக்களப்பு பிரதான பேருந்து நிலையப் பகுதியில் நிறுத்தி வைக்கப்பட்டுள்ளது. அங்கு இலங்கை போக்குவரத்துச் சபை மற்றும் தனியார் பேருந்துகள், வேன்கள், கனரக வாகனங்கள், முச்சக்கர வண்டிகள் மற்றும் மோட்டார் சைக்கிள்களின் சாரதிகள் நிறுத்தப்பட்டு, அவர்களின் உமிழ்நீர் மாதிரி (Saliva) பெறப்பட்டு உடனுக்குடன் பரிசோதனைக்கு உட்படுத்தப்படுகின்றது. இதன்மூலம் அவர்கள் மதுபானம் அல்லது போதைப்பொருட்களைப் பயன்படுத்தியுள்ளனரா என்பது கண்டறியப்பட்டு வருவதாக அவர் மேலும் தெரிவித்தார்.