* வருமான வரிக்கு முன்னரான இலாபம் - ரூ.4.5 பில்லியன் 8.31%ஆல் அதிகரிப்பு
* வரிக்குப் பின்னரான இலாபம் – ரூ.2.9 பில்லியன் 5.25%ஆல் அதிகரிப்பு
* மொத்த சொத்துக்கள் ரூ.943 பில்லியனை எட்டியுள்ளன
* உரிமையாண்மை மீதான வருவாய் (ROE) 14.39%
* மதிப்பிறக்க கட்டணங்கள் (நிலை 3) விகிதம் 1.01% 

2026ஆம் ஆண்டின் முதல் காலாண்டில் (Q1 2026) வங்கி, வருமான வரிக்கு முன்னரான இலாபமாக (PBT) ரூ.4,548 மில்லியனைப் பதிவு செய்துள்ளது. இது முன்னைய ஆண்டின் இதே காலகட்டத்தில் பதிவான ரூ.4,199 மில்லியனுடன் ஒப்பிடுகையில் 8.31% வளர்ச்சியைக் காட்டுகிறது. 

2026 மார்ச் 31ஆம் திகதியுடன் முடிவடைந்த மூன்று மாதங்களுக்கு, செலான் வங்கியால் பதிவு செய்யப்பட்ட வரிக்குப் பின்னரான இலாபம் ரூ.2,906 மில்லியனாக இருந்தது. இது 2025ஆம் ஆண்டின் இதே காலகட்டத்தில் பதிவு செய்யப்பட்ட ரூ.2,761 மில்லியனுடன் ஒப்பிடுகையில் 5.25% வளர்ச்சியாகும். 

நிதி செயல்திறன் அறிக்கை 

2026 மார்ச் 31ஆம் திகதியுடன் முடிவடைந்த 3 மாதங்களில், நிகர வட்டி வருமானம் முன்னைய ஆண்டை விட 13.37% அதிகரித்து, ரூ.8,587 மில்லியனிலிருந்து ரூ.9,734 மில்லியனாக உயர்ந்தது. இதற்கு முக்கிய காரணம், கடந்த 12 மாதங்களில் வங்கியின் சொத்து மதிப்பு, 2025ஆம் ஆண்டின் முதல் காலாண்டின் முடிவில் ரூ.785 பில்லியனிலிருந்து 2026 மார்ச் 31ஆம் திகதி நிலவரப்படி ரூ.943 பில்லியனாகக் குறிப்பிடத்தக்களவு அதிகரித்ததே ஆகும். வங்கியின் நிகர வட்டி மிகையும் (NIM) 2025இல் 4.50%இலிருந்து 2026ஆம் ஆண்டின் முதல் காலாண்டில் 4.23%ஆகக் குறைந்துள்ளது. 

அதே வேளை, வங்கியின் நிகர கட்டண அடிப்படையிலான வருமானம் 24.04% வளர்ச்சியைப் பதிவு செய்து, ரூ.1,863 மில்லியனிலிருந்து ரூ.2,311 மில்லியனாக அதிகரித்தது. இதற்கு முதன்மையாக அட்டைகள், பணம் அனுப்புதல், வர்த்தகம் மற்றும் பிற நிதிச் சேவைகளிலிருந்து வரும் கட்டண வருமானம் என்பவை காரணிகளாக அமைந்தன. வர்த்தகத்திலிருந்தான நிகர இலாபம்/இழப்புகள், நிதி சொத்துக்களின் அங்கீகார நீக்கத்திலிருந்து கிடைக்கும் நிகர இலாபம் மற்றும் பிற நிகர தொழிற்பாட்டு வருமானம் ஆகியவற்றைக் கொண்ட பிற வருமானப் பிரிவுகள் சரிவைக் காட்டின. நிலவும் சந்தை வட்டி வீதங்கள் மற்றும் விலை மாற்றங்களின் தாக்கத்தால், அரசுப் பத்திரங்கள் மற்றும் பங்கு முதலீடுகளிலிருந்து கிடைக்கும் சந்தை மதிப்பீட்டு இலாபங்கள் குறைந்ததே இதற்கான முக்கிய காரணமாகும். 

எனினும், வெளிநாட்டு நாணய வர்த்தக அளவுகள் அதிகரித்ததன் விளைவாக பரிவர்த்தனை வருமானம் உயர்வைக் காட்டியது. வங்கியின் மொத்த தொழிற்பாட்டு வருமானம் ரூ.12,375 மில்லியனாகப் பதிவு செய்யப்பட்டுள்ளது. இது, 2025ஆம் ஆண்டின் இதே காலகட்டத்தில் பதிவு செய்யப்பட்ட ரூ.10,994 மில்லியனுடன் ஒப்பிடும்போது 12.57% வளர்ச்சி ஆகும். இந்த அதிகரிப்பிற்கு முக்கியமாக நிகர வட்டி வருமானம், நிகர கட்டணம் மற்றும் தரகு வருமானம் ஆகியவற்றில் ஏற்பட்ட உயர்வு காரணமாக அமைந்தது. 

மொத்த தொழிற்பாட்டுச் செலவுகள் 19.40% ஆல் அதிகரித்து, 2025ஆம் ஆண்டின் முதல் காலாண்டின் ரூ.5,135 மில்லியனிலிருந்து 2026ஆம் ஆண்டின் முதல் காலாண்டில் ரூ.6,131 மில்லியனாக உயர்ந்துள்ளது. பணியாளர்கள் தொடர்பான செலவுகளில் செய்யப்பட்ட வருடாந்த திருத்தத்தின் காரணமாக, பணியாளர் செலவுகள் 15.41% ஆல் அதிகரித்து, ரூ.2,806 மில்லியனிலிருந்து ரூ.3,238 மில்லியனாக உயர்ந்துள்ளது. பெறுமானத் தேய்வு மற்றும் பெறுமானக் குறைப்பு செலவீனங்கள் உள்ளிட்ட பிற தொழிற்பாட்டுச் செலவுகள் 24.21% ஆல் அதிகரித்துள்ளன. இக் காலகட்டத்தில் நுகர்வுப் பொருட்கள், அட்டை தொடர்பான செலவுகள் மற்றும் பிற சேவைச் செலவுகள் அதிகரித்தமையை இது பிரதிபலிக்கிறது. செலவுகளை திறம்பட நிர்வகிக்க இலக்கு நிர்ணயிக்கப்பட்ட செலவுக் கட்டுப்பாட்டு முயற்சிகளை வங்கி தொடர்ந்து மேற்கொண்டு வருகிறது. 

வங்கி, 2026ஆம் ஆண்டின் முதல் காலாண்டில் ரூ.100 மில்லியன் பெறுமதியான மதிப்பிறக்க கட்டணத்தைப் பதிவு செய்தது. இது 2025ஆம் ஆண்டின் முதல் காலாண்டில் இருந்த ரூ.225 மில்லியனை விட 55.57% குறைவாகும். சர்வதேச மற்றும் உள்ளூர் பொருளாதாரத்தில் ஏற்படும் மாற்றங்கள், வாடிக்கையாளர் கடன் ஆபத்து விவரக் குறிப்பு மற்றும் வங்கியின் கடன் பிரிவின் ஒட்டுமொத்த கடன் தரம் ஆகியவற்றை பிரதிபலிக்கும் வகையில் நிதிநிலை அறிக்கைகளில் மதிப்பிறக்க ஏற்பாடுகள் விவேகத்துடன் செய்யப்படுவதை வங்கி உறுதிப்படுத்தியது. வங்கியின் சொத்துத் தர விகிதங்கள் தொடர்ச்சியாக வலுவாக இருந்தன. மார்ச் 31, 2026 நிலவரப்படி, மதிப்பிறக்க கட்டண (நிலை 3) விகிதம் 1.01% (2025: 1.03%) ஆகவும் நிலை 3 வழங்கல் காப்பு விகிதம் 86.23% ஆகவும் இருந்தன. இது வங்கித் துறையில் உயர்ந்த பதிவாகும். 

2025ஆம் ஆண்டின் முதல் காலாண்டில் பதிவான ரூ.1,438 மில்லியனுடன் ஒப்பிடுகையில், 2026ஆம் ஆண்டின் முதல் காலாண்டிற்கான வருமான வரிச் செலவுகள் ரூ.1,643 மில்லியனாக இருந்தன. நிதிச் சேவைகள் மீதான பெறுமதி சேர் வரி (VAT) ரூ.1,260 மில்லியனிலிருந்து ரூ.1,402 மில்லியனாகவும், சமூகப் பாதுகாப்பு பங்களிப்பு வரி (SSCL) ரூ.175 மில்லியனிலிருந்து ரூ.195 மில்லியனாகவும் அதிகரித்திருந்தது. இதே காலகட்டத்துடன் ஒப்பிடுகையில் இது 11.25% உயர்வை எட்டியுள்ளது. 

வங்கி, 2026ஆம் ஆண்டின் முதல் காலாண்டில் ரூ.2,906 மில்லியனை வரிக்குப் பின்னரான இலாபமாகப் (PAT) பதிவு செய்துள்ளது. இது 2025ஆம் ஆண்டின் இதே காலகட்டத்துடன் ஒப்பிடும்போது 5.25% வளர்ச்சியைப் பிரதிபலிக்கிறது. 

நிதி நிலைமைக் கூற்று 

வங்கியின் மொத்த சொத்துக்கள் 2026 ஆம் ஆண்டின் முதல் காலாண்டில் ரூ.921 பில்லியனிலிருந்து ரூ.943 பில்லியனாக அதிகரித்தது. இது முன்னைய காலாண்டைக் காட்டிலும் நிலையான வளர்ச்சியைப் பிரதிபலிக்கிறது. வங்கி தனது தற்போதைய வாடிக்கையாளர் தளத்தை தக்க வைத்துக் கொண்டு, வங்கிக்கு புதிதாக வரும் கடன்கள் மற்றும் வைப்புத்தொகைகளை பின்தொடர்ந்தது. கடன்கள் மற்றும் முற்பணங்கள் ரூ.628 பில்லியனாகவும், வைப்புத்தொகைகள் ரூ.743 பில்லியனாகவும் உயர்ந்தன. வங்கியின் CASA விகிதம் 28% ஆகப் பராமரிக்கப்பட்டது. 

முக்கிய நிதி விகிதங்கள் மற்றும் குறிகாட்டிகள் 

மார்ச் 31, 2026 நிலவரப்படி, வங்கி நல்ல மூலதனத்துடன் ஒழுங்குமுறை குறைந்தபட்சங்களை விட அதிகமான மூலதன போதுமான விகிதங்களையும் கொண்டிருந்தது. CET1 மற்றும் மொத்த படி 1 மூலதன விகிதங்கள் 11.40% ஆகவும் மொத்த மூலதன விகிதம் 16.38% ஆகவும் இருந்தன. இது வலுவான மூலதன தளத்தை பிரதிபலிக்கிறது. வங்கி சட்டப்பூர்வ தேவையை விட அதிகமாக திரவத்தன்மை காப்பு விகிதத்தை (LCR) பராமரித்தது. அனைத்து நாணய LCR விகிதமும் ரூபாய் LCR விகிதமும் முறையே 192.49% ஆகவும் 188.30% ஆகவும் பராமரிக்கப்பட்டன. மதிப்பாய்வு செய்யப்பட்ட ஆண்டில் உரிமையாண்மை மீதான வருவாய் (ROE) 14.39% (2025 – 15.89%) ஆகவும், சராசரி சொத்துக்களின் மீதான வருவாய் (வரிக்கு முன்னரான இலாபம்) 1.98% (2025 – 2.31%) ஆகவும் இருந்தன. வங்கியின் பங்கு ஒன்றின் இலாபம், முன்னைய ஆண்டில் பதிவான ரூ.4.34 உடன் ஒப்பிடுகையில், 2026ஆம் ஆண்டின் முதல் காலாண்டில் ரூ.4.57 ஆக இருந்தது. மார்ச் 31, 2026 அன்று வங்கியின் ஒரு பங்கிற்கான நிகர சொத்து பெறுமதி ரூ. 128.86 ஆக இருந்தது (குழுமம் - ரூ. 132.17). 

2026ஆம் ஆண்டின் முதல் காலாண்டில், செலான் வங்கி தனது முதன்மை சமூகப் பொறுப்புணர்வுத் திட்டத்தை விரிவுபடுத்தும் வகையில் இரண்டு “செலான் பஹசர நூலகங்களைத்” திறந்தது. இதன் மூலம் நிறுவப்பட்ட நூலகங்களின் மொத்த எண்ணிக்கை 291 ஆக உயர்ந்துள்ளது. இந்த மைல்கல், அறிவு மற்றும் கற்றல் வளங்களுக்கான அணுகலை மேம்படுத்துவதுடன் நாடெங்கிலும் பின்தங்கிய பாடசாலைகளில் கல்வியை வளர்ப்பதற்கும் ஆதரவளிப்பதற்கும் வங்கியின் தொடர்ச்சியான அர்ப்பணிப்பை அடிக்கோடிட்டுக் காட்டுகிறது. Fitch மதிப்பீடுகள் செலான் வங்கியின் தேசிய நீண்டகால மதிப்பீட்டை நிலையான கண்ணோட்டத்துடன் இரண்டு புள்ளிகளால் 2025இல் உயர்த்தி A+(lka) ஆக மேம்படுத்தியுள்ளன.