முன்னாள் இராஜாங்க அமைச்சர் சஷீந்திர ராஜபக்ஷ உள்ளிட்ட மூன்று பிரதிவாதிகளுக்கு எதிராக இலஞ்ச ஊழல் விசாரணை ஆணைக்குழுவினால் தாக்கல் செய்யப்பட்டுள்ள ஊழல் வழக்கு தொடர்பான முதற்கட்ட ஆட்சேபனைகள் மீதான கட்டளையை எதிர்வரும் ஒக்டோபர் மாதம் 8 ஆம் திகதி பிறப்பிக்கவுள்ளதாக கொழும்பு மேல் நீதிமன்றம் அறிவித்துள்ளது.

இந்த வழக்கு இன்று (29) கொழும்பு மேல் நீதிமன்ற நீதிபதி ரவீந்திர பிரேமரத்ன முன்னிலையில் விசாரணைக்கு எடுத்துக்கொள்ளப்பட்ட போதே இந்த விடயம் அறிவிக்கப்பட்டது.

இதன்போது, தற்போது பிணையில் விடுவிக்கப்பட்டுள்ள முன்னாள் இராஜாங்க அமைச்சர் சஷீந்திர ராஜபக்ஷ, இழப்பீட்டு அலுவலகத்தின் முன்னாள் பணிப்பாளர் சேபாலிகா சமன் குமாரி மற்றும் மகாவலி அதிகாரசபையின் முன்னாள் பணிப்பாளர் நாயகம் கீர்த்தி பண்டார கொடகம ஆகிய பிரதிவாதிகள் நீதிமன்றத்தில் ஆஜராகியிருந்தனர்.

வழக்கு விசாரணையின் போது, பிரதிவாதிகள் சார்பில் ஆஜரான சட்டத்தரணிகளான அஸ்திக தேவேந்திர, சமிந்த அத்துகோரள மற்றும் ஜனாதிபதி சட்டத்தரணி பிரேமரத்ன ஆகியோர், இலஞ்ச ஊழல் ஆணைக்குழுவினால் சுமத்தப்பட்டுள்ள குற்றச்சாட்டுகளுக்கு எதிராக முதற்கட்ட ஆட்சேபனைகளை முன்வைத்தனர்.

இதனைத் தொடர்ந்து, இலஞ்ச ஊழல் ஆணைக்குழு சார்பில் ஆஜரான அதன் உதவிப் பணிப்பாளர் நாயகம் சுபாஷினி சிறிவர்தன சமர்ப்பணங்களை முன்வைத்தார். 

இரு தரப்புச் சமர்ப்பணங்களையும் பரிசீலித்த நீதிபதி, அந்தக் கட்டளையை அறிவிக்கும் திகதியை நிர்ணயம் செய்தார்.

இலங்கை மகாவலி அதிகாரசபைக்குச் சொந்தமான செவனகல, கிரிஇப்பன்வெவ பகுதியில் சட்டவிரோதமாகக் கட்டப்பட்ட கட்டடம் உள்ளிட்ட சொத்துக்கள், கடந்த 2022 ஆம் ஆண்டு மே மாதம் 9 ஆம் திகதி ஏற்பட்ட 'அரகலய' போராட்டத்தின் போது சேதமடைந்திருந்தன.

குறித்த சொத்துக்களுக்கு நஷ்டஈடு வழங்குவது அதிகாரப்பூர்வமாக நிராகரிக்கப்பட்டிருந்த பின்னணியில், அதற்கு முரணாக இழப்பீட்டு அலுவலகத்தில் பணியாற்றிய சில அரச அதிகாரிகளுக்குத் தமது அதிகாரத்தைப் பயன்படுத்தி அழுத்தம் கொடுத்து, பிரதிவாதிகளால் 8,850,000 ரூபா (8.85 மில்லியன்) நஷ்டஈட்டுத் தொகை பெறப்பட்டது.

இதன்மூலம் 'ஊழல்' குற்றத்தைச் செய்தமை மற்றும் அதற்கு உதவி ஒத்தாசை புரிந்தமை ஆகிய குற்றச்சாட்டுகளின் கீழ் இலஞ்ச ஊழல் ஆணைக்குழுவினால் இந்தப் பிரதிவாதிகளுக்கு எதிராகக் குற்றப்பத்திரிகை தாக்கல் செய்யப்பட்டுள்ளமை குறிப்பிடத்தக்கது.