பேராதனையிலிருந்து கொழும்பு கோட்டை நோக்கிப் பயணித்த கடுகதி ரயில் தடம் புரண்டுள்ள நிலையில், அதனை மீள் தடமேற்றும் பணிகள் ஆரம்பிக்கப்பட்டுள்ளதாக ரயில்வே திணைக்களம் அறிவித்துள்ளது. 

இந்த விபத்து காரணமாக மலையக ரயில் மார்க்கத்தின் போக்குவரத்து நடவடிக்கைகள் தற்காலிகமாக இடைநிறுத்தப்பட்டுள்ளதாக ரயில்வே போக்குவரத்து அத்தியட்சகர் அசங்க சமரசிங்க தெரிவித்தார். 

கடந்த இரண்டு நாட்களாக குறித்த பகுதியில் நிலவிய பலத்த மழை வீழ்ச்சி காரணமாகவே இந்த விபத்து சம்பவித்துள்ளதாகத் தெரிவித்த அவர், ரயிலை மீள் தடமேற்றும் பணிகளுக்கு மேலதிகமாக, சேதமடைந்த தண்டவாளங்களைச் சீரமைக்கும் பணிகளும் தீவிரமாக முன்னெடுக்கப்பட்டு வருவதாகக் குறிப்பிட்டார். 

இந்தப் பணிகள் நிறைவடைந்தவுடன் மலையக ரயில் சேவைகளை விரைவாக இயல்புநிலைக்குக் கொண்டுவர எதிர்பார்ப்பதாகத் தெரிவித்த அத்தியட்சகர், மாலை வேளையிலான அலுவலக ரயில் சேவைகளை இயக்குவது குறித்து மீளமைக்கும் பணிகளின் முன்னேற்றத்தைக் கொண்டே தீர்மானிக்க முடியும் எனவும், தற்சமயம் அது குறித்துத் திட்டவட்டமாகக் கூற முடியாது எனவும் மேலும் தெரிவித்தார். 

அத்துடன், தடம் புரண்ட ரயில் மீண்டும் பயணிப்பதற்குப் பொருத்தமானதா என்பது அது கொழும்புக்குக் கொண்டு வரப்பட்ட பின்னரே தீர்மானிக்கப்படும் எனவும் அவர் சுட்டிக்காட்டினார்.